عزيزي المقاتل المغوار...اللذي جرد نفسه وأصبح مجاهداً وفارساً للشتيمه والتجريح والطرقعه لمن يخالفه في الاتجاه الايديولوجي....الكل بيطرقع للكل... كله بيطرقع.. ويخون...ويتهم الآخر انه هايضيع البلد...وعلا صوت الطرقعه عالياً خفاقاً في جنبات الفيس بوك.... من فضلك هدي الطرقعه...واسمع السطرين اللي بعد النقطتين المتعامدتين دول:
قضيه مرفوعه تطالب بعودة مبارك نظراً لعدم شرعية تخليه عن السلطه....آلاف من أمناء الشرطه يتظاهرون بعد تجمعهم عن طريق "الفيك بوس" وحرقوا ما تبقي من ملفات شئون الأفراد بوزارة الداخليه ويطالبون بعودة محمود وجدي...اخلاء اعتصام ماسبيرو وفض اعتصام طلبة وأساتذة كلية الاعلام بالقوه ، اخلاء سبيل المتهمين بقتل متظاهري الأسكندريه، وسبيل يوسف والي، كل القيادات الاعلاميه الفاسده لا تزال في مواقعها ماعدا كالعاده ...كبش فداء وحيد وورقه محروقه هو أنس الفقي.....بعد ماعملنا زي الهابله اللي مسكوها طبله في الاستفتاء...الجيش هاينزل اعلان دستوري...الثلاثي المرح لا يزال يرتع في أضواء المسرح....وثالثة الأثافي....جمال مبارك يظهر مع زكريا عزمي في منتدي رجال الأعمال......
واحنا بكل سذاجه عمالين نتداول الشائعات والمواد الاعلاميه اللي بتشتم في جميع القوي الوطنيه في مصر....كله بيتشتم واحنا اللي بننشر النار واحنا اللي بنولعها....وللأسف أنا أولكم....وللأسف أنا كمان ايدي ملوثه.....لو مارجعناش لعقلنا......وحددنا هدفنا وعدونا الحقيقي...يبقي نستحق أكتر من كده....عدونا موش البرادعي ولا الاخوان ولا السلفيين ولا الليبراليين ولا عمرو موسي ولا الاشتراكيين والناصريين ولا المستقلين...ولا الأقباط علي فكره، عدونا دلوقت بيضحك علينا كلنا لأننا بقينا "عملاء" ليه ....واحنا موش داريانيين أصبحنا "بلطجيه" غير مدفوعي الأجر....ببلاش يعني، وكله في خدمة الفلول؟!
يا عدوي...يا ايناس...يا سوزان...يا داليا...يا معتز....يا سمير...يا هبه..يا فاطمه...يا مني....يا رشا ياللي عنيكي اتهرت من الغاز يوم الجمعه....يا ياسر..يا وليد...يا خالد...يا طارق...يا رامي...ياهشام...يا جورج...يا ميلاد....يا كل اللي حط ضهره في ضهر زميله يحميه...وايده في ايده يسنده...يا كل اللي شال علم مصر وغني حلوه بلادي السمره.....عدونا جمع خيوطه وعتاده ورجع يضرب من جديد بعد ما الرماه نزلوا يجروا من علي التبه علشان الغنايم ... انتوا ومصر كلها هاتكونوا غنيمه ليهم..لو ماصحيتوش....من فضلكم كل واحد فينا يتوقف عن وضع الفيديوهات والبوستات المدمره ....وتعالوا النهارده ندور في الفايلات المتسيفه عندنا أو علي النت...ونطلع صورة الشهداء....ونبص ليهم....بس في ضحكة بسيوني...بص في براءه وش ايهاب...بص في ابتسامة سالي زهران اللي مليانه أمل وبتترجاك تكمل...بص في نقاء وش مصطفي الصاوي.....افتكر صورة المومياء بتاعت خالد سعيد...علشان خاطري....سيب الغنائم وشيل سيفك وقلمك وتعالي معايا تاني....ننقذ ما يمكن انقاذه...تعالي نرجع ندافع عن حقنا...أو نموت بشرف زي اخواتنا......سيب التورته...اوعي تشترك في تقسيمها...التورته دي مسمومه...مافيش وقت نضيعه علي فكره.....احنا بينضحك علينا...ولازم نكون رجاله
باعتذر لكل اللي اتعودوا مني علي السخريه والكوميديا والقفشات...صدقوني المره دي موش قادر.....لكن انا متفائل ان الدعوه دي هتلاقي صدي عندكم...لاني عارف ان كلكم جواكم نفس الاحساس
ليست هناك تعليقات:
إرسال تعليق