by Diaa Diab on Saturday, 19 March 2011 at 17:54
وظهرت النتيجه وقالت الأغلبيه لا....
- وديتونا في داهيه....كده موش هيبقي فيه استقرار.....
استقرار ايه؟ غلبناكم يالي قلتوا نعم.....
- كده هاتتلغي الفقره التانيه......
ومين بس اللي جاب سيرة الفقره التانيه؟ كبسه....احنا اللي غلبنا
شعب مصر العظيم...مبروك عليك...مبروك علي الكل..اللي قال نعم واللي قال لا... اتناقشنا واتخانقنا ..بوستات ..فيديوهات...صور...كومنتات...تحليل عميق...حفر في أعماق أعماق المسأله الدستوريه.... انت واخد بالك من حلاوتك يا شعب؟ واخد بالك ياااض يا شعب....؟ قبل الثوره كنت تافه يا شعب..كنت هايف يا شعب...كنت لامؤاخذه...تعر وتكسف يا شعب. بص في المرايه يا شعب وشوف نفسك لو سمحت...ايه الحلاوه دي يا شعب؟ ياللي نضفت الميدان ودهنت رصيفه بعد ماعملت ثوره وأسقطت النظام في 18 يوم وحليت أمن الدوله وخرجت بكل انتماءاتك وأطيافك ...بس علشان تقول رأيك في الدستور ...كل ده في اجازة نص السنه يا شعب يا بن الرايقه؟
صوَّت يا شعب؟ قلت رأيك؟....بغض النظر عن النتيجه خليك راجل يا شعب.... بلاش نصك يغيظ نصك يا شعب...بلاش تشمت في بعضك يا شعب...بلاش تطلع لسانك ليك يا شعب، بلاش تتحفز لنفسك وكل ماتحصل غلطه نتيجة اختيارك تلوم نفسك ونصك يقول لنصك "شوفتوا...موش لو كنتوا قولتوا.....كذا...كان ماحصلش كذا؟" خليك ناصح يا شعب...ايدك في ايدك يا شعب...كلمه واحده يا شعب...اتحمل نتائج اختيارك وبلاش نداله مع بعضك يا شعب...اللي قال نعم يحط ايده في ايد اللي قال لأ....ونكمل طريقنا مع بعض. في غزوة أحد الشباب المتحمس اختار الخروج للحرب خارج المدينه ولأنهم كانوا أغلبيه... الرسول صلي الله عليه وسلم ومن معه ممن كان رايهم البقاء في المدينه نزلوا عن رأيهم....ولما انتهت الحرب لم يلم أحد الآخر لم يقل الباقون "وديتونا في داهيه يا فالحين؟" بل تحمل الجميع النتائج وبقي الصف موحداً.
علشان كنت مخلص وعندك اصرار ربنا وقف جنبك يا شعب...وعيني عليك بارده ثورتك ماشيه زي السكينه في الزبده. بص لقدام بقي واكبر وماتخافش من حاجه...لا وطني ولا اخوان ولا حتي الزمر الخفي، والانفلات الأمني أبو رجل مسلوخه. بص لعضلاتك بقي وجس المجانص بتاعتك يا شعب، فوق لمصلحتك وبلاش تشتم وتهزأ وتخون في بعضك يا شعب. انت لسه ماشفتش حاجه يا صاحبي، التقيل جاي ورا.....اجمد واثبت وشد حيلك وجمع نفسك واشتغل، انت صوََّت ..... اياك تلطم زي النسوان لما تقابلك مصاعب......استرجل يا شعب... والف مبروك عليك يا معجباني ياغالي...عروستك الحلوه مصر...قمر بيلالي
ليست هناك تعليقات:
إرسال تعليق