آكلك منين يابطه آكلك منين؟ أغنيه قديمه للشحروره, خطرت في بالي وأنا أتابع أخبار محاكمات المأسوف علي ملكه مبارك.
تيشرتات بيضاء وأتوبيسات مكيفه وبلطجه وضرب بالطوب لأهالي الشهداء وفي حماية الأمن واحنا آسفين يا ريس ولا لإهانة زعيم الأمه، ماتفهمش بقي ده عن حب ولا جواز صالونات؟
مجموعة محامين كويتين جاءوا لرد الجميل لمبارك علي دوره في تحرير الكويت، وكأن مبارك راح حررها لوحده وطظ في آلاف الجنود المصريين اللذين ذهبوا للمهمة وطظ قي ملايين المصريين اللذين تحملوا النتائج!
أحاكمك منين يا بطه والديب واقف علي باب العشه؟
أحاكمك منين يا بطه والمحاكمات أصبحت سريه حفاظاً علي حقوق مبارك وكرامته ويعيش مبارك واحنا موش مهم.
أحاكمك منين يا بطه والضباط المتورطين في قتل الثوار هم من يحرسون الأحراز ويجمعون الأدله؟
أحاكمك منين يا بطه والأحراز ممكن يتلعب فيها زي فيلم حسن سبانخ؟
أحاكمك منين يا بطه وأقوال الشهود ممكن تتضارب خصوصاً لو طلبوا شهادة تامر بتاع غمره أو شاهد العصر طلعت زكريا؟
أحاكمك منين يا بطه والبديني يهرول للسلام علي العادلي بحراره وكان ناقص يبوسه في بقه قدامنا.
أحاكمك منين يا بطه والأبواق الإعلاميه الحكوميه أثبتت إن القناصه طلعوا من 6 أبريل وان الثوار قتلوا شهداء الشرطه الأبرياء وبعض ضباط الجيش لأنهم قابضين وممكن البطل يطلع أخو البطله في آخر الفيلم وعلي دراعاتهم تاتو كنتاكي.
أحاكمك منين يا بطه وانت مبطرخه في مستشفي خمس نجوم وبتاكلي وبتشربي الحلو كله من دمنا واحنا بنكح تراب؟
شوفي يا بطتي، احنا شعب طيب آه، بس ساعة مابناخد علي قفانا بيكون رد فعلنا غير متوقع وافهميها زي ماتفهميها.
حتي لو فلتي مننا يا بطه، هاتروحي من ربنا فين؟ محكمة المولي عز وجل أحرازها مابيتلعبش فيها، القاضي فيها هو الله والحاجب والمنادي جبريل وبتكون لايف وهاي ديفينيشن والشهود هم الخلائق أجمعين، واطمني يا بطه مافيهاش إعدام والحكم هاخليهولك مفاجأه.
رفعت الجلسه.
الحل الوحيد
ردحذفاننا ندبح البطة الشقية دي