عارف انت لما واحد مقرف ينف في منديل ويرميه علي الأرضيه الرخام وييجي واحد ابن ناس ويجيب تلات أربع مناديل نضاف ويشيل المنديل المبربر ويرميه في الباسكيت؟
أهو أردوغان عمل معانا كده لما طرد السفير الصهيوني وأرسل سفينة حريه جديده في حماية الأسطول الحربي التركي قائلاً "المتوسط ليس بحيره للعربدة الإسرائيليه".
عارف سعادتك لما تقف ست كبيره في الأوتوبيس وهي عرقانه وبتنهج وماحدش من اللي حواليها يقف لها وتسمع صوت واحد محترم من بعيد بينادي "تعالي يا حاجه ويقوم من آخر الأوتوبيس ويقف لها ويقعدها؟
أردوغان عمل معانا كده لما قام متنرفز وخلع المايك وانسحب علي الهوا في مؤتمر دافوس اعتراضاً علي اعطاء اكسترا تايم وضربات جزاء لبيريز، بينما السيد عمرو موسي مرشحنا المحتمل لرياسة الجمهورية يجلس منجعصاً وقد إلتفت الساق بالساق؟
ليه بتحرجنا كده يا أردو؟ ليه يا برنس الليالي؟ ده احنا مات لنا برصاص الصهاينه خمسة أرواح، أرواح يا عالم موش ملبس؟
كان يجب إعلان الحداد الرسمي في مصر كلها موش نسمح بنزول فيلم شارع الهرم، واحنا كده بنضيع يا وديع! يعني تاني زي أيام مبارك: أهلاً بالرقاصين والهجاصين أما الشباب اللي زي الورد نزحفه علي بطنه عريان علي أرضية تواليتات سجن الحضره!!
ليه يا أردو كده؟ ماتسكت زي ما احنا ساكتين؟ وحتي لو اتكلمنا يا ناس، الغاز اللي رايح بسعر أيام حسين صدقي وليلي مراد ده نعمل فيه ايه؟ طب الكمتري والجوافه والخضار بتاعنا اللي رايح بسعر الجمله تل أبيب ده نعمل فيه إيه؟
نكدت علينا يا راجل الله ينكد عليك عيشتك انت وأحمد الشحات.
بس تعرف يا أردوغان، انت راجل ياض، راجل حر بصحيح، أرجل من كل الشنبات اللي كابسه علي نفس أهالينا من المحيط إلي الخليج.
وموش طق حنك ولا هز اكتاف، لا ده انت راجل حويط أوي، عارف امتي تكش وامتي تلسع وكله بالقانون، براوه عليك يا أنيشتا.
أقولك باللغه اللي يفهمها المصريين، انت اللي تستاهل البيبسي، موش البت اللي بتدي الفساتين. تستاهله ولارج كمان.
قلبت علينا المواجع يا باشا
ردحذف