منقول عن مي علي
ضايقني أوي كل الناس اللي فجأة طلعت تقول إن الناس اللي لسة معتصمين في ميدان التحرير دول ناس بيخربوا البلد، وعايزينها تخرب!
وفي ناس كانوا أهدى شوية في الاتهامات فقالوا إنه يا جماعة حرام انتوا كده سبب في إن ناس مش لاقية تاكل ولا لاقية تشتغل، مش حرام عليكم اللي بيشتغل باليومية! مش حرام عليكم اللي ما قبضش! مش حرام عليكم الأطفال اللي خايفة!
وناس تانية للأسف طلعت فيهم وقالت: بصوا ميدان التحرير بقى عامل إزاي! ده اتكسر خالص! ده باظ!
(كإنه ما تكسرش على دماغهم!)
أنا بس عايزة أقول لكم كذا حاجة:
أولا: أنا لست مع ولا ضد المظاهرات الآن! أنا مش عارفة إيه أنسب وسيلة للتحرك! كل اللي أنا عارفاه إنه ما ينفعش نسيب حق الناس اللي ماتت وأصيبت، والأهم حقنا في بلدنا وكرامتنا، يروح هدر! بس إيه التصرف الصحيح، أنا لا أدعي معرفته
ثانيا: معظم الناس (معظم وليس كل) اللي لقيتهم بيتكلموا في الموضوع ده هما أصلا ما نزلوش المظاهرات، وبالتالي هم لم يصنعوا الحدث، وإنما شاهدوه فقط عبر التليفزيون والفيسبوك. بس!
ومن لم يضحِ بنفسه ودمه، ومن لم ير الموت بعينيه من يوم 25 يناير و28 يناير، ومن لم ينج بحياته من الرصاص الحي، ومن لم يحمل بنفسه أخوه أو أخته أو ابنه أو بنته بعد مفارقة الحياة؛ فلا يملك أن يصف من ضحوا بأنهم مخربون!!!!
ثالثا: وده الأهم: احنا فعلا يا جماعة بيتلعب بينا كورة واحنا مش داريانين!
مين اللي قال إن المفروض البلد تقف كلها عشان المظاهرات؟؟
هل البلد كانت وقفت يوم الأربعاء والخميس (26، 27) مع وجود مظاهرات؟
الناس كانت بتروح شغلها وامتحاناتها والمحلات عادي جدا، مع إن المظاهرات كانت في أكتر من مكان!
دلوقتي المظاهرات انحصرت في مكان واحد بس: ميدان التحرير!
يعني هل معنى كده إن المفروض 6 أكتوبر والهرم ومدينة نصر ومصر الجديدة والتجمع الخامس والمعادي وحلوان وكل مناطق مصر تقف، عشان خاطر التحرير واقف؟؟!!
لأ طبعا! وده بدليل إن فيه بعض المحلات بدأت تفتح بعد ما المظاهرات بعدت عنها
طيب ليه بنقول إن مفيش أكل ومفيش بنزين، والناس مش بتروح شغلها، ومفيش عمال باليومية لاقيين شغل، و......؟؟؟
الحقيقة عشان في حظر للتجوال!
طب وإيه العلاقة؟
العلاقة إنك لو سمعت أصحاب المصانع بتقول إيه هتعرف إنهم مش عارفين يشغلوا الناس بحيث إنهم ييجوا الشغل ويشتغلوا ويمشوا قبل معاد حظر التجوال!
وبالتالي، فلو في مصنع شغال، يبقى احتمال مش صغير إن العمال فيه بيشتغلوا ورديات 24 ساعة، ييجوا النهاردة الصبح، ويمشوا بكرة الصبح!
هل ده أسلوب منطقي لعمل المصانع؟ طبعا لأ
وده بيأدي لإن مفيش أكل كفاية بيتصنع؛ ومفيش عيش كفاية بيتخبز، ومفيش بنزين كفاية بيتنقل للمحطات، ومفيش بالتالي عربات نقل نتقل الأكل اللي بيتصنع لإنها محتاجة بنزين أو سولار أو أي وقود!!!!
يبقى هل المتظاهرين هما السبب في وقف البلد؟
(لاحظوا إننا بالفعل لم نسمع - أو لم أسمع - أي صاحب عمل يشكو من المظاهرات إلا أساسا بسبب حظر التجوال اللي حصل)
طب سؤال تاني: هوا احنا استفدنا إيه من ساعة ما ابتدى حظر التجوال؟
أولا: أول يوم، ومع إخلاء الشوارع كلها من المارة نتيجة خوف الناس من معنى حظر التجوال، وإن ممكن يتضرب عليها نار لو فضلت في الشارع، الشوارع كانت فاضية علشان الحرامية والمساجين اللي أطلقوا يومها من السجون مخصوص يعرفوا يسرقوا ويخوفوا الناس براحتهم، بدون أي مشاكل أو تصديات لهم! (ومن غير ما يتضربوا بالنار!)
وطبعا مع إدخال بعض المكالمات التليفونية المخطط لها إلى التليفزيون لتكون استغاثات! (عمركم في حياتكم شفتوا حد بيتسرق أو بيتكسر المحل بتاعه، بيكلم التليفزيون؟؟!! هل ده تصرف منطقي وتلقائي؟؟!!
وهل أي حد فيكم حاول يكلم التليفزيون، عرف يوصل له؟؟ ولا كان على طول مشغول؟!!!!!!
ولا في حد قرر يخوفنا من كل حاجة، ويقول إن محلات اتكسرت وننزل تاني يوم الصبح نلاقيها سليمة ؟؟!!)
طيب ما علينا من موضوع التليفزيون ده لإنه موضوع كبير
خلينا في ثانيا: ثاني يوم: دلوقتي الناس خافت من أول يوم، فهتعمل إيه؟
أولا محدش هينزل البلد معظم اليوم عشان خايف
وكمان المحلات هتقفل هيا كمان عشان خايفة، فمفيش أكل!
وبعدين، نلم كل الناس اللي في الشوارع من ميدان التحرير، ونجيبهم بيوتهم يحرسوا، وطول ما هما خايفين، مش هيفكروا في مظاهرات، وهيتهدوا طول الليل سهرانين وطول النهار نايمين من التعب
(على فكرة، أنا لغاية دلوقتي ما لقيتش أي سبب معلن حد أعلنه لفرض حظر التجول، غير إنه النظام عايز يسيطر على المظاهرات. بس الفكرة إن المظاهرات ما كانتش بتقف بالليل؛ وهما ما بطلوش فرض حظر التجول رغم كده. طب يبقى إيه الهدف؟ أكيد في أسباب تانية غير حكاية المظاهرات دي!!)
ثالث يوم (الأحد): طبعا ما حدش راح الشغل، لإن حظر التجول بقى في ميعاد لا يسمح للناس بإنها تروح أشغالها وترجع تاني بيتها قبل الحظر
ده غير إن المواصلات في الشارع قلت. طب الناس هتروح شغلها إزاي؟
وكمان الناس لسة خايفة من الحرامية والمجرمين، فالمحلات لسة بتقفل والبنزين ما بيوصلش، يمكن عشان المجرمين اللي بيطلعوا على الطريق؛ والبنوك هتقفل لإن أسهل إنها تقفل من إننا نفتح فروع قليلة عليها حراسة كتيرة من البوليس.
يبقى البلد هتقف، وهنقول كلنا إن السبب هما مين يا ترى؟ طبعا المتظاهرين
نفضل على الحال ده ثلاث أيام. إيه ده! دي برضه مش نافعة، والناس لسة عايزة تروح مظاهرات! إيه الشعب اللي مابيزهقش ده!!!
طيب حاضر. تعالوا فجأة نقول للناس إن الريس "ما كانش ناوي يترشح" - واخدين بالكو من "ما كانش ناوي" دي! يعني مش مثلا: أنا مش هترشح وأنا أصلا ما كنتش ناوي! لأ، هوا كل اللي قاله إنه "ما كانش ناوي"
طيب خير، ده طلع راجل طيب وابن حلال أهو، بغض النظر عن إنه فضل سبع أو ثمان أيام مش عايز يمن علينا بفضله ويقول إنه "ما كانش ناوي"
وبغض النظر إنه ساب 300 بني آدم يتقتلوا، وآلاف يصابوا عشان حضرته ما كانش راضي يقول إنه "ما كانش ناوي"
وبغض النظر إنه قال الخطاب ده مباشرة بعد مقابلة السفير الأمريكاني السابق - يعني مش شرط يكون عشان خاطر عيوننا!
فجأة كده، ييجي الريس في خطاب بتاع "ما كانش ناوي" ده، ويقول شوية حاجات كده في الصميم!
أولا: اللي نزلوا يوم 25 يناير دول كويسين، بس بعد كده جت لهم عناصر مندسة لهم أجندات مشوهم على مزاجهم (طبعا ده على اعتبار إنه بيكلم حد ما كانش هناك ولا يعرف ناس كانت هناك، ولا بيشوف أي تليفزيون! وكمان على اعتبار إننا شباب أهبل وغير واعي وأي حد يقول لنا روحوا يمين بنروح وروحوا شمال بنروح)
طيب ماشي، وعدت دي
وبعدين: الشرطة اتصرفت صح جدا ومشيت مع الناس اللي بيتظاهروا، بس للأسف في ناس وحشة اعتدوا على الشرطة، وأحدثوا شغب - برضه ناس مندسة، معرفش اندسوا منين -
طيب وبالنسبة للشرطة برضه اللي قتلت ناس كتيييييييييييييييييير وبعدين سابت البلد واختفت
لأ، ومش بس اختفت من البلد والمظاهرات، دي حتى شرطة الآثار اللي في الصحراء والمناطق الأثرية البعيدة اللي ملهاش دعوى بأي حاجة، برضه مشيت! :S
بس بغض النظر عن كل ده - إيه يعني 300 واحد يموت، فدا البلد يعني - إنما الشرطة اتصرفت صح
وبعدين: يا وحشين، دا أنا طول عمري خادمكم. طب أنا بقى أصلا "ما كنتش ناوي"
كل الناس: تصفيق حاااااااااااااااد ودموع عاطفية
بعديها بيوم: الإنترنت اتفتح
بعديها بدقائق: يا جماعة دول بتوع المظاهرات دول "مخربين"! دول عايزين يودوا البلد لفين؟ كفاية كده بقى! دول وقفوا حال البلد!! بصوا البنوك اللي قافلة، والشركات والمحلات، والعمال اللي باليومية!
دول ناس "مندسة" فيهم، عملاء. خلوا بالكم يا شباب - ما تخلوش حد "يمشيكم على مزاجه"
كفاية "تخريب" بقى
اللي يلاحظ يلاقي إن كل الألفاظ دي ظهرت فقط بعد خطاب الرئيس!
اللي كتب الخطاب ده عرف يحط حاجات في الأول تثبت في اللاوعي بتاع الناس، ويطلع على لسانها في صورة خناقات أول ما يتفتح الإنترنت
طب واشمعنى يتفتح دلوقتي؟؟؟ ما هو من يوم الجمعة وهو مقفول!!!
عشان الناس زهقت وتعبت من البلطجية والإحساس بعدم الأمان، ومن قلة الأكل والبنزين، وكمان خدوا جرعة من خطاب الريس ومن الإعلام اللي شغال على ودنه يردد نفس كلام "التخريب". وهما دلوقتي جاهزين للانطلاق والخناق مع بعضهم
احنا مش هنيجي جنبهم! هما اللي هيتخانقوا مع بعض!
وحصل بالفعل كل ده بعد دقائق أو ساعات من فتح الإنترنت!
طيب وبعدين؟
دلوقتي الناس بتكره المظاهرات، مش كده؟
خلاص، حلو أوي! نبعت شوية ناس يموتوا الناس اللي هناك أو يضربوهم بشكل فظيع،
والناس هتقول: بصوا دي حرب أهلية! المصريين بيموتوا بعضهم! طب وإيه اللي خلا أصلا ناس تروح النهاردة؟! كفاية كده مظاهرات! ده شباب أكيد "مغيب" ومش فاهم حاجة!
حلو أوي! بس خلاص! خلصنا من وجع الدماغ ده! ومش هيقدروا يقولوا إننا قتلناهم ولا حاجة، دول مصريين في بعض. يا حرام، معقولة، مصريين يضربوا بعض؟! لأ عيب خالص! اهو ده اللي كنا بنحذر منه قبل كده
ومازال حظر التجول مستمر، من أجل تعطيل المصالح والأعمال!
يا كل من لسة محتفظ بشوية عقل بعد كل الأحداث الهلامية اللي احنا فيها دي
أرجوكم فكروا شوية:
الناس اللي في ميدان التحرير لو قعدوا طول العمر هناك، مش هما اللي موقفين حال البلد!
مش هما اللي موقفين جميع أحياء محافظات القاهرة والجيزة و6 أكتوبر وحلوان!
ولو عايزين، كانوا ممكن يعملوا حظر تجول في ميدان التحرير وبس، والناس غير كده تمشي حالها، وبدل كوبري 6 أكتوبر، في طريق صلاح سالم وسور مجرى العيون. وكمان ممكن نمنع المتظاهرين من دخول شارع طلعت حرب، والاكتفاء بالميدان، وبكده كل البورصة والبنوك والمحلات وحتى الباعة الجائلين هيشتغلوا
ولو مفيش بلطجية، الناس هتتعاون جدا!! الناس أصلا في مظاهرة من كام يوم ماشية في البطل أحمد عبد العزيز، وكانت الشرطة سابت البلد، بابا بيقول لي، الناس عاملة كردون حوالين نفسها عشان ما توقفش طريق العربيات!
هيا دي الناس اللي موقفة حال البلد؟؟؟!!!!!
أرجوكم فكروا قليلا بعقولكم في كل ما يحدث!
النظام ده أخرج جميع الحيل الممكن تخيلها، وكمان الغير ممكن تخيلها! واللي يظن أن أي حاجة بتحصل دلوقتي هي بمحض الصدفة أو بتتابع الاحداث، يبقى محتاج يراجع نفسه جامد أويييي
هارجع واقول تاني:
أنا مش مع المظاهرات، ولا ضدها، أنا معرفش إيه اللي صح
بس اللي أنا عارفاه كويس إن الناس دي اكتسبت حق التعبير وحرية الرأي بدمها!! بدمها!! بدمها!!! وبأرواح الشهداااااااااااااء!!!!
ما ينفعش حد دلوقتي ييجي يقول لهم: رَوَّحوا عشان البلد تمشي!
هيا البلد اللي تمشي، وهما براحتهم يقعدوا أو يرَوَّحوا! ونشوف معاهم إزاي ما يعطلوش المرور وخلاص!
ولو انتم وافقتم على منعهم من التظاهر، يبقى لو سمحتم امنعوا نفسكم من أي حرية في التعبير عن النفس أو الرأي أو الاعتراض على الظلم، ليكم أو لولادكم من بعديكم
ليست هناك تعليقات:
إرسال تعليق