رساله من ميدان التحرير

رساله من ميدان التحرير

by Diaa Diab on Sunday, 06 February 2011 at 11:25

رساله من ميدان التحرير:

مالك يا شعب؟ احنا اللي اجبرنا مبارك يعين نائب وخلينا جمال يستقيل

احنا اللي حبسنا العادلي وعز ومساعدين وزير الداخلية

هم اللي فرضوا حظر التجول وقطعوا عيشك

هم اللي قفلوا البورصة وخسروك فلوسك.

هم اللي بيطفشوا الاجانب وبيدمروا المتحف وبيخربوا السياحة

هم اللي سحبوا البوليس وسرحوا الحرامية علينا يا شعب

يا شعب نسيت؟ مين صدر غازك ببلاش و خفى عنك الانابيب

مالك يا شعب نسيت؟ مين اللي باعلك الرغيف بنص جنيه وحاش عنك ابو شلن

مالك يا شعب نسيت؟ مين خلى الاتوبيس بجنيه ونص وزحمة برضه بعد ما كان بربع جنيه

مالك يا شعب؟ بتشكى من عطلة الاعمال بعد ما كنت بتشكي من البطالة اصلا

دستورنا كان فيه وظيفة واعانة لكل شاب دلوقت بقى بيقول امك في العش ولا طارت

طول عمرك تشكي من سعر السكر والزيت دلقت احنا اللي بنطلب حقك غليناهم ؟؟؟

احنا الخونة العملا بتوع الجزيرة وكنتاكي وايران ليه مبارك بيسمع كلامنا ويحبس احمد عز الراجل الطيب؟

فين مطالبك يا شعب اللي اتحققت؟ لقيت وظيفة لابنك وجوازة لبنتك؟

فين مطالبك يا شعب اللي اتحققت وعاوزنا نرجع؟ البوليس لسه بيقولك بطاقتك

فين مطالبك؟ برلمانك مزور وناس مش منك بيتكلموا عنك وعاوزنا نرجع !

مبارك حقق مطالبك؟ عوضك دم الشهيد؟ اللي ما قتلوش اسرائيلي لكن مصري اوسخ من العدا

انضربنا بالنار والغاز والطوب واندهسنا بالخيل والجمال والمصفحات وبرضه بتقول احنا اللي ولعناها ولازم نرجع؟ قدرت على الضحية والجاني لا؟

مالك يا جيش؟ بعد ما كنت بتدور على بلطجية وسلاح بقيت بتدور على كاميرا وقلم ؟؟؟

مالك يا شعب؟ نتنياهو بينزل عليه ضيف واحنا اللي عملا؟ باعو غازك ليه واحنا اللي عملا؟

اسرائيل خايفة على مبارك خوفها على الضنا واحنا اللي عملا؟

اسرائيل بتقول ها تلوص من بعد مبارك واحنا اللي عملا؟