سعادتك محبط؟

أنا محبط؟ عباره باسمعها من معظم الناس الآن، لأن كل حاجه فيما يبدو رجعت لما قبل 25 يناير.

انت محبط؟ محبط لأن المحاكمات شكلها هاتطلع فشنك؟

إذا كنت انت محبط فأنا متفائل، وأملي في ربنا كبير، حتي المحاكمات لو طلعت فشنك، الناس مش هاتسكت وستكون هذه هي القشه اللتي قصمت ظهر المشير، فمبارك هو من جمع الشعب المصري كله القبطي والسلفي والليبرالي والإخواني، جمع الشعب كله علي كرهه وبغضه.

انت محبط، وانا متفائل وياريت مبارك ياخد براءه علشان ال85 مليون يطلعوا بلابيص علي المركز الطبي العالمي ويمطروه بوابل من اليوريا.

سعادتك محبط من الطرمخه الواضحه وضوح الشمس علي موضوع القصاص من الشهداء؟ انا بقي متفائل وباقول حضرتك ان الدم عمره مايبقي ميه وهذه عقيده عند الشعب المصري، لو المواضيع مشيت عنب وجه رئيس محترم الملفات ستفتح ولن يهدأ الشعب حتي يري القتله معلقين علي اعواد المشانق ولو المواضيع ظروتت وخدنا بمبه سيظل الألتراس في كل مباراه ينشدون النداء الخالد " مش ناسيين التحرير يا ولاد الو... " وسيمطرون الباشاوات بأكياس اليوريا عالية الاوكتان وهايخدوا حقنا مبلول.

محبط من علو صوت أصحاب احنا آسفين يا ريس واللجنة الإليكترونيه والتيشرتات البيضاء بتاعت لا لإهانة زعيم الأمه "مبارك يعني" أنا بقي متفائل وباقولك خير وبركه، دي فرصه كويسه علشان نكتشف عملاء أمن الدوله وأعضاء اللجنه الإليكترونيه اللذين كانوا يجلسون معنا في مدرجات الكليه واللذين ينتشرون في كل الجروبات وبينزلوا بوستات وتعليقات فاقعه لغاية ما ريحتهم فاحت، علشان نعرفهم كويس بعد ماكانوا بيدارو وخايفين وبيتمحكوا في الثوره، لسه محبط؟ الاشكال دي كانت موجوده في كل زمن حتي ايام الرسول صلي الله عليه وسلم وهم فئة المنافقين والمرجفين، نحن ندافع عن قضيه وهم يدافعون عن الباطل وطاغوت ربنا غضبان عليه، دعهم يجمعوننا ويوحدوننا ضدهم، هل تعلم كيف يعانون؟ هل تعلم كيف يبيتون كل ليله يتألمون ويبكون علي ملكهم اللذي ضاع وسيدهم اللذي سقط؟ هل تعلم بمدي ما يعانونه من ضياع؟ كل كلمه بتواجههم بيها في ميزان حسناتك وكل وقفه ضدهم هي نصره للحق.

محبط لغياب الأمن والفوضي والحوادث الغريبه؟

أحب أطمنك ان ربنا لطف بينا انت عارف سكان العشوائيات عددهم كام وحالتهم عامله ازاي؟ لو الناس دي هاجت علينا كانت البلد انتهت في ظرف 48 ساعه، شفت لندن؟ شفت أمريكا بيحصل فيها ايه لما يحصل فيضان أو إعصار؟ في عرف الثورات هذا شيء طبيعي والوضع ده هايتصلح وأهي فرصه لتطهير الشرطه وحسابهم معانا بعدين ده لو الدنيا مشيت عنب واذا خدنا بمبه لا تقلق سيضطروا لضبط الأمن عندها والسيطره علي الإنفلات الأمني بس ساعتها بقي هاكون محبط زيك وامري لله.

محبط لأن الإتهامات نازله ترف علي النشطاء وشباب الثوره بالعماله والخيانه وانهم قابضين؟ مش بس كده، ده الثوار الأطهار اللذين صنعوا الثوره يقوم الآن عملاء أمن الدوله وأعضاء اللجان الإليكترونيه باتهامهم بقتل ضباط شرطه وجيش وانهم كانوا جزء من مخطط أمريكي! ألا تعلم يا عزيزي أن الأنبياء أنفسهم لم يسلموا من لسان المنافقين والمرجفين؟ اتهموا نوح عليه السلام في عقله وحاولوا إحراق أبو الأنبياء إبراهيم وآذوا موسي فبرأه الله مما قالوا وسجنوا يوسف الصديق؟ واتهموا مريم البتول في عفتها؟ وقالوا في عيسي عليه السلام قولاً عظيما؟ بل لقد تطاولوا علي نبينا الحبيب محمد صلي الله عليه وسلم وقالوا ساحر وقالوا مجنون بل لقد اتهموه في شرفه في حادثة الإفك؟ الم يتهموا أتباع الانبياء وأتباع الحق بأنهم شرذمة قليلون؟ وأنهم يريدون أن يظهروا في الأرض الفساد؟ ده عادي يا برنس الليالي، لسه محبط؟ انا بقي متفائل ودورنا هو الدفاع عن هؤلاء الأطهار اللذين ضحوا بحياتهم من أجلنا، إوعي تكون لسه محبط؟ أزعل منك أوي.

محبط لأن الإعتقالات والمحاكمات العسكريه لسه شغاله والمنافقين بيهللوا والإعلام سكتم بكتم؟ أنا معاك بس الوضع مختلف زمان كان اللي بيروح لا يشعر به أحد النهارده الدنيا مقلوبه والكل يرفض المحاكمات العسكريه للنشطاء ولن نهدأ حتي ينتهي هذا الوضع ويلغي قانون الطواريء وتعود للمواطن كرامته، لن اقول المفقوده لأننا عمرنا ما كان لنا كرامه أصلاً بل ساقول ستعود لنا كرامتنا التي لم نرها أساساً.

محبط لأن القوي السياسيه أصبحت متنافره وبعد ماكنا بنتفق علي اسم الجمعه والمليونيه في ليله أصبحنا نري 10 أو 12 اسم للجمعه الواحده؟ دي فعلاً حاجه تجيب إحباط لكن لا تقلق كل يا أخي ما نبعد عن بعض تحصل حاجه تجبرنا اننا نتجمع تاني.

محبط لأن ميدان مصطفي محمود بقي روكسي؟ ده غثاء يا عزيزي، ييجي ايه روكسي جنب مصطفي محمود أيام عزه، أيام طلعت زكريا وغاده عبد الرازق اللتي رفعها أنصار مبارك علي الأعناق؟ هذا نوع من الغتاته حتي يصيبونا بالإحباط، لو كان أنصار مبارك فيهم خير ماكانش رماهم الطير واليوم اصبحوا أضحوكه وماده للسخريه وفيديوهات عمرو مصطفي علي النت تشرح القلب الحزين.

محبط لأن كابوس الأحكام العرفيه والحكم العسكري مطروح كأحد السيناريوهات؟ وحتي لو حصل كده فلن يستطيع المجلس الإستمرار لان صاحب بالين كداب والجيش لازم يرجع لثكناته لأن بلدنا وضعها حساس وحدودها مفتوحه ولازم يترك السلطه للمدنيين ويا سيدي احنا ياما شفنا وعمرنا بفضل الله أطول من عمر حكامنا وهناك ضغط شعبي هائل لن يقبل أبداً أن نعود لأيام أشرس مجلس شعب وطشة الملوخيه.

محبط لأن جميع مرشحي الحزب الوطني وفلوله جاهزين لخوض الإنتخابات القادمه في ظل ضعف وتخبط وعدم خبرة المنافس؟ شوف بقي حزب الكنبه اللي بيقولوا عليه ده سيفاجيء الجميع برد فعل سيكون لطمه كبري لفلول الوطني وكل من يتاجر ويراوغ في مواقفه اسمعها مني: شعبنا بيحوم كالفراشه ويلدع كالنبله.

محبط لانتشار الزباله واشغال الطريق والتعديات؟ يوم مالبلد تبقي بلدنا ويبقالنا رئيس وحكومه اللي نظفوا ميدان التحرير ودهنوا الأرصفه سيجعلون مصر أنضف من الصيني بعد غسيله الصبر جميل، طول عمرنا عايشين في الزباله ماجاتش يعني عالكام شهر دول.

محبط لرؤية المتحولين والمنافقين والطبالين يتصدرون المشهد من جديد؟ ولا يهمك دي فرصه للفلتره واكتشاف البهلوانات والمهرجين وزي ماقلتلك شعبنا فاهم كويس، شعبنا مش عبيط، هو بيستعبط بس.

محبط لما شفت عميد الشرطه العسكريه بيدي التحيه للعادلي وشفت العادلي وهو بيضحك كأنه بياخد صوره 6 x 9 ؟ دي كلها "إفرازات" موش هاقول أكتر من كده وافهمها زي ماتفهمها.

محبط لما شفت فريد الديب وافتكرت حسن سبانخ واللعب في الأحراز؟ ماقلتلك بقي لو مبارك أخد براءه الشعب هايعمل ايه، ولا انت مصر انك تقرف القراء؟

لسه محبط ولا هاتحط ايدك في ايدي وكتفك في كتفي؟ لسه برضه محبط؟ علي كل حال أنا متفائل، وعاوزك معايا لو قالوا "مبارك ابونا" قول ورايا "الله مولانا ولا مولي لكم" لو قالوا سنعيد موقعة الجمل قول ورايا " الله أعلي وأجل" اجمد واثبت ولا تيأس المعركه دائره بين الخير والشر والحق والباطل، المهم أن يكون هناك رجال، اوعي تكون لسه محبط؟

سعادتك محبط؟ أنا بقي ضياء، تشرفنا.