كان ياما كان فيه غابه في حته
فيها معزه وجدي وبطه
عاشوا سنين يقرفهم تور
يتشالوا يتحطوا..برضه خابور
حطوا ايديهم في ايدين بعض
لاجل العيش والدين والعرض
قاموا عليه وجابوه في الأرض
غنوا ورقصوا وقالوا خلاص
هم وراح صرصار وانداس
وشويه وهما في عز الفرحه
جالهم ديب وعنيهم سارحه
أدي تحيه بإيد مفروده
والإيد التانيه فيها قرطاس
قال هاحمي لكم راحة بالكم
إدوني المعزه هاحلبهالكم
اسقيكوا من خيرها واسقي عيالكم
الجدي قال: والله خير
من النهارده انت الأمير
البطه قالت: حيلك حيلك انت وهو
جري ايه يا جدي؟ موش بتغير؟
هز في دقنه وقالها تخرس
سيبي الديب يسقينا لبنها
ياخد باله ويرعي ويحرس
الديب قال: وسعوا طيب علشان أحلب؟
قال للبطه: اديني ريشك
قالت: ليه؟
صرخ الديب: من غير رد!
معزتي بتكتك من البرد!
قصقص ريشها، جناحها وديلها
وقال للجدي: خلاص شيلها
الجدي قال: أشيل البطه؟
رد الديب: دقنك ياخفيف...قوام شيلها
اديني شعراتها، اعمل أوتار وأغنيلها
قال الجدي: امرنا لله، دقني أهيه يالا افتلها
الديب قال: شطار ياولاد كتر خيركو
الاتنين قالوا: طب ماتيلا اسقينا حليبها؟
الديب قال: المرحله صعبه، طولوا بالكوا
الصبر جميل هاحلبهالكوا
ولا عطشتوا؟
أيوه عطشنا.....
عيوني الجوز....ادوني بزازكو
رائعة يا ضياء
ردحذفانا بس مش صعبان عليا الا الجدي ... اللي افتكر ان هو اللي ح يعمل قوانين المزرعة
ورسيت في الأخر على نتف دقنه وحلب بزازه
محمد سعيد