تخاريف الغضب

اعتدنا قبل كل جمعه علي حقنة العضل اللي بتخفف وجع الفقرات اللذي نعيش فيه منذ " تخللي" البرنس

وبين الجمعتين يمسك الشعب الصاجات ويغني "اديني الحقنه بسرعه، أرجوك محتاجه الجرعه" وننتظر أخبار ال15 يوم بتوع النائب العام بفارغ الصبر فإذا فرغ صبرنا يتم تجديد ال 15 ب 15 تاني ولما الشعب يهيج وتجيله الكريزه بيخليهم 30 ولما الجو يهدي يتم إخلاء سبيل المحجوزين ولا عزاء للمتقرطسين.

 

وكل ما الناس تزوم تشتغل أغنية: جمال وعلاء ، علاء وجمال، سوزان إخلاء، كمان مره جمال وعلاء، علاء وجمال وسمعني سلام "بص العصفوره؟"

شهداءنا؟ فين القتله؟ طب فين القناصه؟ الفيديوهات اللتي سلمناها للنيابه؟ وحدة مكافحة الإرهاب بأمن الدوله فين دلوقت؟ هو موش لجنة تقصي الحقائق قالت أنهم متورطين؟ طب هم فين؟ فين الواد اللي كان راكب الحصان اللي نط عليه المتظاهر ابو بلوفر أحمر وقعه؟ وفين باقي بلطجية موقعة الجمل؟ فين ضباط أمن الدوله اللي تم تسليمهم للجيش في الميدان بكارنيهاتهم يوم الموقعه؟ فين هم يا ناس؟ دلوني عليهم

 

أحمد عز شفناه في البدله البيضاء مره وهو بيشرب مياه معدنيه وبعدين دخل بيات شتوي واختفي؟

وخد عندك مواسير الإشاعات تطفح كل ساعه والتانيه مابين الخراب المستعجل اللي جاي علي سكوتر وما بين الرخاء اللي هاينزل براميل وأنا وسعادتك بنبقلل في الساونا.

عندما يعتصم الشباب في كليه أو أمام سفارة الكيان الصهيوني يكون رد الفعل فريره فالكهربا والغاز والنزول علي الركب وشتيمة الأم بأعضائها التناسليه والإعتقال والمحاكمه واصدار الحكم كل هذا لا يستغرق أكثر من ثلاثة ايام بتوقيت جرينتش. بينما محاكمات القتله واللصوص والبلطجيه محاكمات جملي والبوتاجاز مطفي كمان.

 

أم سيد تعتصم أمام ماسبيرو و"تبوس" صورة البرنس اللي هو نفسه مفروض يتحاكم، لكن هانعمل ايه بقي، الله يخرب بيت الإارتجاف الأذيني اللي موقف حالنا. والبرنس وأم سيد يتنسمون عبير حرية 25 يناير! يعني أم سيد "تبوس" واحنا ننضرب بس!

 

قوانين متحمره علي السريع، وتنزل سخن وعلي الأكيل.

 

الشرطه اختفت بل انقرضت وتركت الشعب يلعب مع بعضه أتاري وفارم فيللي في الشارع.

 

قادة أمن الدوله تم عقابهم بشده وتعيينهم محافظين في الحركه الأخيره وتم ترقية الشباب الصاعد مكانهم ليكمل المسيره وشعار المرحله "انزل علي ركبك يا .. امك انت مصري"

 

مع احترامي الشعب ده لن يركع مره أخري، ولو سمحتم ماحدش له دعوه بأمنا، أمهاتنا ليس لهن دخل في الموضوع. لو العيال غلطانين يبقي يتعاملوا معاملة القتله والمجرمين بتوع النظام ويتم التحقيق معهم ثم تحويلهم لمحاكمه مدنيه وكده يعني، المعامله بالمثل. هل جمال وعلاء حد قالهم "انزل علي ركبك يا .. أمك؟ شبابنا زي جمال وعلاء بالضبط. علشان خاطري بلاش امتهان كرامة المواطن، كفايه، آه اللي يغلط يتعاقب بس بلاش الإهانه، لأن الشعب تحرر وإهانة الحر تمنها غالي.

 

وبعد الظهور الإختباري لأمن الدوله أمام السفاره في العماره وتابعه قفه الأمن المركزي وعلشان مانظلمهمش ظهروا الحقيقه برضه في ماتشات الأهلي مع الاتحاد والزمالك مع الجونه. ويتحرق الشعب في الشوراع ورجعنا من حيث بدأنا، اسرائيل خط أحمر والكوره علي قائمة الأولويات.

 

خلصنا من اللي جوه وعلمناهم الأدب؟ انتوا بقي ياللي بره طظ فيكم، انتخاب يوك، علشان انتوا مأجورين وهاتبيعوا أصواتكم، هاجت الدنيا ولوحنا بوقف التحويلات، في نفس اليوم بالليل: " يا جماعه كنا بنهزر قفشتوا كده ليه؟ "، ولا يهمك هاتنتخب يااض، فكها كده بقي ده انت قلبك اسود أوي؟

 

كانت نتيجة التخاريف الموضحه عاليه اشنعال التويتر والاحتقان الشديد والدعوه للنزول الجمعه القادمه لوضع النقط فوق الحروف قبل مانقع سوا من علي الروف.

 

وما هي إلا ساعات من انتشار التويتات حتي فتحت أبواب القرارات اللتي تبرد القلب بسيل منهمر:

 

إيه الحلاوه دي؟ كلية الإعلام تجمد نشاط عميد الكليه، موش بس كده هناك " وعد" بإلغاء الفصل النهائي للطلبه ومجالس التأديب للأساتذه إتلغت. طب مالحياه سهله أهه! أمال ايه بقي؟ وكان لزومو ايه القلق والكهرباء والفض بالقوه؟

 

وآدي السولار رجع للضخ تاني والأزمه بتخف، ايه النور ده؟

 

إحالة مبارك للجنايات خلال 72 ساعه، ماشي هاقلوظ العمه وأصدق، أكمل بقي؟......هايجيله ارتجاف في فتحة الشرج وهايتحجز في المستشفي (شرم الشيخ بجوار نعمه باي) بس الكلام هايكون يوم السبت (بعد الجمعه يعني) لما الشباب يروح بالنهار واللي يستني بالليل يتحاكم محاكمه عسكريه ودوخيني يالمونه وديني بقالة حسونه)

بدء محاكمة أحمد عز لمعرفة سبب تضخم ثروته وبالمره يقيسوا أسياخه طولها كام. تصدق إن أنا كنت نسيته أساساً؟

 

زكريا عزمي رجعوه تاني الحجز بعد الإفراج.

وموش بعيد المهدي المنتظر يظهر يوم الأربعاء أو الخميس.

وأنا متوقع مفاجآت لذيذه واخبار ساره في الايام القادمه مع إذاعة أغنية عظيمه يا مصر يا أرض اللوا، باهديها مقدماً لتيته نورا والخاله ياسمين والعمه توته والأبناء روان وتوتا ولينا وسمعني سلام " أنا اتخنقت" بالبيض المخفوق.

ليه كده؟ هاه؟ ليه كده؟ ليه حرام علينا نفرح؟ ليه خساره فينا النضافه؟ ليه الأجيال القادمه تتف علينا وتقول اخص عليهم ضيعوا مستقبلنا؟ ليه أمشي في بلدي وأنا مخنوق؟ ليه التذبذب والتردد؟ هما اتجاهين ليس لهم ثالث، إما الشعب وانقاذ مصر وإما الدياثه وانقاذ الفلول.

يا جيشنا العظيم والله بنحبك وبنحترمك، بقايا النظام هاتقل قيمتك وأمن الدوله عامل زي إبليس مع سيدنا آدم يقول له " هل أدلك علي شجرة الخلد وملك لا يبلي" وهو يريد لنا الخراب وتعكير صفو علاقتنا بكم وطردنا من الجنه اللتي فتح ابوابها الشهداء.

أشهد لكم بعدم التواطؤ لكنني لا أعفيكم من تهمة التباطؤ اللذي يصل الي الريبه. هل هناك من يخرب مكاسب الثوره؟ طب ما تدوله أجازه؟ خايفين منه؟ طب سيبونا عليه.

أبوس جزمة أصغر عسكري فيكم إنحازوا كلية للشعب وبيعوا مبارك وعصابته بيع نهائي مصدق في الشهر العقاري. لا تسمحوا بإهانة الشعب، عاقبوا المخطيء بس بلاش تهينوا كرامته.

نداء إلي الشباب اللذي سينزل إلي الميدان في جمعة الغضب، إياك إياك أن تمتد يدك بسوء لفرد من أفراد الجيش مهما كان الاستفزاز إنه جيش مصر وشرف مصر، الموت أهون من أن يهان أو تنتقص كرامته. أيها الشباب الواعي، إياك إياك الهتافات الهجوميه ضد الجيش، عدونا هم القتله واللصوص وضباط الشرطه المتواطئون، ضعوا ثقتكم في الجيش لآخر لحظه وطالبوه بالقصاص وأعيدوا تجديد مطالبكم اللتي لم نحصل منها علي شيء.

عزيزي المجلس العسكري: كلك مفهوميه من فضلك "إنحازلي شكراً

يا إخواننا في جيش مصر العظيم، إياك والنزول علي الركب وشد الأجزاء والضرب في المليان، الشباب دول إخواتك وبيحبوك وبيعملوا كده علشانك، واذا حصل وشميت ريحة خيانه زي يوم الجمل إياك أن تقف علي الحياد، إنزل وشد الأجزاء واضرب في المليان والقلب داعيلك.

يا فلول البلطجيه ويا بلطجية الفلول ويا خونة الدوله ويا قناصه ويا مرتزقه ويا متخاذلين وقاعدين في بيوتكم وقالعين الميري ويا منكدين علينا عيشتنا ويا هليبه وزعلانين علي ضياع الميغه، كلكم كده.....اللي يحرقكم بجاز.

يا قراء اتنين كابوتشينو الكرام ماتاخدوش في بالكم كل اللي أنا قلته ده تخاريف والحياه زي الفل ولا حد يزعل نفسه وكل واحد يرجع علي شغله حتي لا نعطل عجلة الإنتاج. أما اللي فسوها بقي، ربنا ينتقم منهم.