اتنين كابوتشينو تستضيف نواره نجم

حديث نواره نجم عن أحداث الثوره دون تزييف أو إنحياز
نقلاً عن برنامج "مشوار للميدان"
لمن عاش هذه اللحظات , ما أجمل الذكريات، ومن لم يعشها، تخيل وتذوق. أسيبكم مع نواره بنت صافي والفاجومي.

أنا لا أشمت ولكنِّي أتشفي

قبل أن تبدأ القراءه، نصيحه من أخوك لو عندك عمه البسها من فضلك، ولو ماعندكش هات فوطه وقروطها حوالين دماغك علشان نافوخك مايستهواش.

جاهز؟

"أم ماجد، بدويه طلبت زيارة مبارك فاستأذنت الحرس، ورغم مهامه العظيمه سمح لها بالدخول لزيارته، وبدون تطويل علي سعادتك تطور المشهد عندما رأت الريس سطيحه فبكت واحتضنت سوزان، قامت سوزان عيطت هي روخره ثم بكي مبارك لمدة خمس دقائق ودعت له ثم انصرفت"

" حديث هنا وهناك عن انجازات مبارك خلال الثلاثون عاماً و التي يجب أن نتذكرها وليس فقط مساوؤه"

في فيديو انتشر علي النت انتشار النار في الهشيم بت بيضا وبشعر أصفر تبكي بحرقه وهي ترتدي كولييه يحمل صورة مبارك وتقول وهي بتتشحتف: "حرام عليك يا بابا مبارك أكبر غلطه عملتها انك سيبتنا"

" ارحموا شيخوخة الراجل"

"الراجل صاحب عيا"

"مبارك يتشبث بملاية السرير (علشان يفكرونا بمشاهد ولادة مني جبر اللي تقطع القلب في فيلم الحفيد) عندما دخل عليه أعضاء النيابه وقال "خلااااااص هاتحبسوني؟" ويضاف للمشهد زجاجة تاباسكو حين يورد الخبر أن سوزان ثابت بكت واتشحتفت وقالت "انتوا خلاااااااص هاتسجنونا؟"

وزيادة في حرق القلب: "جمال لا يستسيغ طعام السجن فيذهب للكانتين ويشتري علبتين تونه له ولأخيه كطعام للغداء" (لا أدري لماذا لم يضيف الخبر انها تونه فتافيت من بتاعة الساندويتشات وليست التونه الفاخره القطع....يعني..... علشان احنا نسح بالدموع وقلبنا يتقطع)

وأخيراً صوره لهايدي راسخ وخديجه الجمال ولاد الناس الطيبين الشيك مذيله بخبر انهم سيزوروا سجن مزرعة طره، ولك أن تتخيل قطع الملبن دي وهبو ريحة جلة الجمايس القادم من المزرعه يزكم أنوفهم الدقيقه التي لم تعرف سوي جادور وبيوند باراديس وهيوجو ديب رد.

سعادتك بتعيط ولا ايه؟ لا اجمد كده ده لسه فيه كتير.

حورات وتوك شو واتصالات تليفونيه تطالب بالرحمه والشفقه أو تتهم بالشماته، وعيب مايصحش ودي موش أخلاق المصريين, وطبعاً الساده بتوع أنا آسف يا ريس وتامر بتاع غمره وانت كده بتصعبها عليا.

ويتعالي نداء الوعاظ: بلاش شماته حرام عليكم

فنسارع نحن ونقول: لا لا احنا موش بنشمت، ثم نتوقف عن سرد الجرائم ونترك الساحه خالية للطم الخدود وشق الصدور والنواح علي الراجل الطيب صاحب الضربه اللي الشعب الواطي بهدله هو وعيلته المسكينه وولاده اللي عايشين علي التونه والنواشف.
ثم رأينا الرئيس ممداً علي سرير طبي وفي يده كانيولا 24 وظلت هذه الكانيولا طوال أيام المحاكمات ولا أدري ما هو نوع المحاليل اللتي يتلقاها الرئيس؟ وهل لا يمكنه الجلوس علي كرسي متحرك مثلاً؟ بالعكس كان هايقطع قلب الناس أكتر.

وحفاظاً علي حقوق ومشاعر الرئيس صارت الجلسات سريه. ووثقنا في عدل ونزاهة القضاء، فقام شهود الإثبات بتغيير أقوالهم وأصبحوا شهود نفي! الم أقل لكم أننا ألذ شعب في العالم؟

ثم جاء سيادة المشير وشهد أن الرئيس لم يعط أوامر بإطلاق النار، الرئيس بريء!!

ألم تسمعونا أعظم الكلام وأجمل الألحان أنكم تلقيتم أوامراً بإطلاق النار وتسوية ميدان التحرير بالأرض ولكنكم رفضتم؟ فإذا كان الرئيس لم يأمر بإطلاق النار فمم حميتم الثوره؟ من برد الميدان في فبراير شباط الأول؟

وها هي الأنباء تتسرب أن اللذي أعطي الأوامر بضرب النار هو اللواء أحمد رمزي، يعني الرئيس بريء!!

تم تبديل سيديهات المخابرات بسيديهات من علي اليوتيوب ومنتدي فتاكات مع برومو فيلم الباشا تلميذ.

علي أساس أننا شعب أهطل!

يعتمد الإعلام والعصابه اللتي تخدم الرئيس أو أياً كان من له مصلحه في نشر هذه البروباجندا أن شعبنا من أطيب وألذ شعوب العالم، شعبنا ألذ من ساندويتش فريسكو جريللد تشيكن بطل الطعم اللذيذ من هارديز.

لكن الناس الغتيته من الشعب زينا كده لهم رأي آخر في الموضوع:

  

أولاً تعريف الشماته:

        في مختار الصحاح وعند رد الكلمه لأصلها "شمت" : الشَّماتَةُ الفرح ببلية العدو

والشماته تكره في الرجل الصالح اللذي لم يرتكب جرماً وقد جاء في القرآن علي لسان هارون  مخاطباً موسي عليه السلام حين عاتبه علي تفلت بني اسرائيل وعبادتهم العجل [قَالَ ابْنَ أُمَّ إِنَّ الْقَوْمَ اسْتَضْعَفُونِي وَكَادُواْ يَقْتُلُونَنِي فَلاَ تُشْمِتْ بِيَ الأعْدَاء وَلاَ تَجْعَلْنِي مَعَ الْقَوْمِ الظَّالِمِينَ]. وقيل لأيوب عليه السلام : أي شيء من بلائك كان أشد عليك قال : شماتة الأعداء.

والسؤال هنا هل السيد مبارك رجل صالح؟

عيني في عينك كده؟

طب هل السيد مبارك راجل طيب؟

طب هل هو حتي راجل عادي؟

طب هل الئيس بريء؟

ان لم يقتل الرئيس المتظاهرين فلدينا أقوال أخري:

لقد جمعت مصائب وجرائم مبارك خلال الثلاثون عاماً المنصرمه فاذا بي أحصل علي فهرس كتاب الكبائر للإمام الذهبي واليكم الفهرس، اقصد جرائم مبارك:

قتل النفس (خالد سعيد، السيد بلال، 876 مواطن هذه هي حصيلة 2011 فقط)

منع الزكاة (حتي مصارف الزكاة يتم الاستيلاء عليها)

عقوق الوالدين  (عمل حساب تبرعات مكتبة اسكندريه باسم امه وجعله تحت تصرف مراته)

هجر الأقارب  (ماكانش يعبر أقاربه)

أكل الربا  

أكل مال اليتيم وظلمه (هو كان بييتمهم الأول وبعدين ياكل مالهم)

غش الإمام الرعية وظلمه لهم

الكبر والفخر والخيلاء والعجب والتيه

شهادة الزور (هو فيه أكتر من تزوير صوتي وصوت سعادتك)

قذف المحصنات (هتك عرض الصحفيات بفعل بلطجية النظام)

الغلول من الغنيمة (من 30 الي 70 مليار أيهما أقرب)

السرقة

قطع الطريق (اطلاق سراح المجرمين علي الشعب الأعزل)

الظلم

المكاس (الضرائب يعني)

أكل الحرام وتناوله على أي وجه كان

الكذب في غالب أقواله

القاضي السوء

أخذ الرشوة على الحكم

الرياء

الخيانة

المنان

التسمع على الناس وما يسرون (أمن الدوله بملفاته وسيديهاته)

النمام

اللعان

الغدر وعدم الوفاء بالعهد (يوووه من أول الخطه الخمسيه الي خطة الالف يوم وحتي توشكي)

تصديق الكاهن والمنجم (عرافه توقعت له أن يحكم هو وأولاده من بعده)

البغي

الاستطالة على الضعيف

أذى الجار  (اسأل جيرانه)

أذى المسلمين وشتمهم (الارهابيين والمحظوره واعداء الوطن)

أذية عباد الله والتطول عليهم

الجدال والمراء واللدد (وزياده علي كده العند)

منع فضل الماء  (أسوأ منه اغلاق المعابر علي الفلسطينيين)

نقص الكيل والزراع

الأمن من مكر الله

تارك الجماعة فيصلي وحده من غير عذر  (ماحدش شافه بيصلي جماعه في مسجد نادي هليوبوليس)

الإضرار في الوصية (كان سيورث مصر كلها لابنه موش بس ثروته)

المكر والخديعة ( اقرب حاجه موقعة الجمل وحديث العربيه بتاع دي منبا يا معلمي منبا وتعالي فتشني...فتشني فتش)

من جس على المسلمين ودل على عورتهم (سيديهات أبو الفتوح ودينا عندما رفض التنازل عن توكيل البي إم)

ابتلانا الله بإعلام مضلل يطبل ويهلل ويوجه ومصلحة الوطن هي آخر مايفكر فيه. في يوم وليله اصبح مبارك بريء وستنادي الأصوات قريباً انه هو اللذي يستحق البيبسي، ويكفينا نحن رقبة الزجاجه. 

فلقونا بتناقل عبارة الشيخ الشعراوي رحمة الله عليه "الثائر الحق يثور ليهدم الفساد ثم يهدأ ليبني الأمجاد"

لكننا كلما هدأنا لنبني الأمجاد يأتينا الفساد مره أخري لأننا نسينا أن نشد السيفون.

لو لقيت نفسك هاتنخ وعينك هاتدمع علي مبارك، لو لقيت آخر مشهد في فيلم امبراطورية ميم بيتكرر قدامك وسحب الورق كله بيقول "بابا" " الست هانم" اوعي تضعف، هات صورة المسكين خالد سعيد قبل وبعد وانظر اليها جيداً، هات الصور الأرشيفيه بتاعة العباره وبص للقتلي والغرقي.

لقد شمت فينا مبارك ثلاثون عاماً، لم يرحمنا مبارك ولم يحزن علي ضحايانا بل كان يهيص ويزأطط في استاد القاهره هو والمدام تاني يوم غرق العباره، شمت فينا مبارك وهرب ممدوح اسماعيل.

لم نره الا جباراً شعره أسود كالفحم، جلد وجهه مشدود، حتي حين كان يذهب لعمل عمليه جراحيه في الخارج كان يعود بأسرع وقت ويظبطوه علي متن الطائره قبل هبوطها مطار القاهره بالحقن المتينه فنراه أمام الكاميرات كالجمل الشديد امعاناً في ذلنا وتعذيبنا.

كان الشعب يلحس التراب في الشتاء للحصول علي أنبوبة بوتجاز والصهاينه يحصلون عليه مدعماً نقياً باقل من سعر التكلفه ويصل الي باب البيت.

اننا لا نشمت، اننا نشفي غل سنوات طويله، اننا نشفي عار الذل والمهانه, اننا نشفي صدورنا الثقيله من لوعتنا وحزننا علي ضياع بلدنا ودماء شهدائنا.

اننا نحاكمه علي افعاله وجرائمه ولا علاقة لنا بشخصه فالله أعلم به.

لا رحمه ولا هواده، سنحاكمه ونصدر حكم العدل عليه، ثم بعد ذلك ننظر في أمر حالته الصحيه.

أنا آسف يا ريس حاولت ألاقيلك عذر أو مخرج فلم أجد الا الغل والظلم والقتل والاجرام، آسف ماقدرش أرحمك يا ريس، اللي بيرحم ربنا سبحانه وتعالي ويومك أمام الله قرب....قرب أوي.

لن تشفي صدور أهالي الشهداء وملايين المظاليم حتي يرونك تعاقب ويتحقق فيك القصاص، لن نتعاطف مع أي شيئ يقال عنك وعن غلبك وعن عجزك فقد اصبح كل ذلك سيما أونطه.....عاوزين فلوسنا.

يوميات الثوره من التناحه الي التنحي

لم نكن نحلم بما حدث ويحدث الآن، عشنا دوماً نقرأ التاريخ فإما مشوه وإما مزور أو مبالغ فيه. لكننا ومنذ 25 يناير ولأول مره نعيش التاريخ ونصنعه ونراه أمامنا وليداً نهدهده ونحمله ونحميه من نسمة الهواء حتي يشب ويكبر ويتلقاه أبناؤنا سليماً معافي و فتياً يبعث فيهم الأمل والعزم وعزة الانتماء لأمة كسرت قيدها وحررت نفسها بدماء الشهداء.

اليكم التاريخ كما عشناه بحماسه وترقبه وثورته، جمعت كل تعليقاتي وتويتاتي منذ هروب بن علي وحتي تخلي بن حسني يوماً بيوم كشهادة شخصيه وتأريخ لثورة من أعظم الثورات عبر التاريخ.

بدأت القصه برؤيا رأيتها قبل صلاة الفجر مباشرة:

ملحوظه: لم أقوم بأي تغيير في البوستات فعذراً ان كان هناك بعض الآراء أو التوقعات التي جاءت "فشنك"

البدايه، 6 يناير 2011:

رأيت اليوم رؤيا رائعه لم أر مثلها في حياتي إلا مره واحده فقط رأيت السماء تفتح أبوابها بنور عظيم اتجهت نحوه فوراً طائرات كثيفه لقصفه فتلاشت في لحظات ثم رأيت فرحه عارمه وتهليل علي وجوه الناس مع علمهم أنه سيكون هناك معاناه شديده (هذا ماشعرت به) مع ذلك فهم يستبشرون, بعدها استيقظت علي صوت آذان الفجر.

8 يناير 2011:

انت مازهقتش؟ احنا زهقنا. سنك كبر وجلدك كرمش وعينك قفلت وبتمشي بالعافيه وكل شويه يسفروك في حته تعمل مرمه وترجع, الدنيا تضرب تقلب حواليك وانت ولا هنا حتي صوتك اللي ياما كنا بنتسلي لما نسمعه بقي ينرفزنا ويغمنا, انسحب بقي وسيبنا في حالنا آن الأوان انك تمشي وتعتزل بقي يا........يا هاني يا شاكر.

14 يناير 2011: (هروب بن علي)

- أنا موافقك يا (......) شعبنا طبيعته مختلفه لا يمكن يثور وان حصل حيتقرطس وينضحك عليه...بس التاريخ بيقول انه شعب أقوي من جلاديه...يذوب جلاده ويتلاشي لكنه يظل وينبت من جديد...صحيح بييجي جلاد تاني...لكنه سيظل شعب لغز...غريب...مالوش حل..متذبذب..مابين الانجازات والترهات

- شرارة التحرير انطلقت من تونس..الي مزبلة التاريخ يا زين العابدين يا من دست كل فروض الاسلام تحت قدميك.....ويا من تظنون الشعوب حملان وديعه ومتاعاً يورث...حذاري...الطوفان قاااادم....بركاتك يا جورباتشوف....الله يمسيك باخير يا شاوشيسكو....بياع الخضار التونسي المسكين الذي حرر بلاده بتلاته ليتر بنزين سيكون النبراس اللذي سيلهم كل بلادنا العربيه المحتله من قبل الطغاه، وضابطة البلديه اللتي صفعته علي وجهه و كانت سبباً في اندلاع الثوره، قصه سنظل نرويها لأطفالنا واحفادنا. يا شعب تونس يا حر يعايشك برشه وعقبال شعب بوروندي الشقيق.

- المستقبل مضمون باذن الله هما عيلين لو كل عيل شال شنطه فيها خمسه سته مليون هايعيشوا ملوك في السعوديه خصوصاً ان بانده بيعمل أوفرات كويسه وممكن يشتروا العفش من الحراج...الدور والباقي علي شعب بوروندي المسكين

يا شعب تونس الحر جاوبني, ايه هو طعم الحريه؟

ايه شكل الشمس في طلعتها تاني يوم الصبحيه؟

اوصفلي دقة قلبك من الفرحه؟ اوصفلي ازاي لون الصرخه؟

طب قوللي, حلو الاصرار؟ علمني ازاي نبقي كبار.

علمني ازاي افتح صدري لرصاص غدار.

علمني ازاي دمي حيجري...يحضن دمك.

علمني ازاي علمي الخايف يحضن علمك.

اوصفلي ايه يعني كلمة بكره؟ خليني طب ألمس ديل الفكره!

طب قوللي ايه يعني حتي تحدي؟ ادعيلي يوم زيك أرجع بلدي

24 يناير:ادعيلي يوم زيك أرجع بلدي

ليس من حقي وانا مبطرخ في دبي أن أدعوا المصريين لتحرير مصر يوم 25 يناير والخروج فاتحين صدورهم ولكن لي الحق أن أدعوا الشرطه للرفق بالشعب الغاضب فالضرب في الميت حرام وأدعوا الله أن يسلم هؤلاء الشباب من كل سوء ويردهم الي أهلهم سالمين

25 يناير: (اندلاع الثورة)

-         شعب يحكمه رجل "مبارك" ورئيس وزراؤه "نظيف" وداخليته "حبيب" ورئيس حزبه "عز" وأمين سياساته "جمال" ورئيس برلمانه "سرور" ورئيس شورته "شريف" وشيخ أزهره "طيب" طب عايزين ايه تاني يا شعب نمرود عايز ضرب الجزمه؟

-         ‎25 يناير سيكون اختباراً حقيقياً للشرطة المصريه فهل هي فعلاً قادره علي حفظ الأمن ضد الغوغاء وزعزعة الاستقرار والقله المنحرفه ولا الراجل الطيب ده يحجز علي مصر للطيران تذكره لجده ومنه يطمن علي زين الهاربين؟ والست الأولي تحجز علي دبي واهي بالمره تحضر مهرجان التسوق؟ الكره في ملعب حبيب الآن..ادعوله ادعووووله

26 يناير

-         عاوز تشوف الشباب اللي زي الورد، عاوز تشوف حاجه تشرح قلبك...خش علي اللينك ده واسمع الأم المصريه اللي كانت ماشيه في الشارع وشوف الشباب اللي زي الورد بيعمل معاها ايهhttp://www.facebook.com/diaa.diab1/posts/188622444498798

27 يناير:

-         باذن الله فجر يوم السبت القادم سيأتي لنا بشمس مختلفه..اللهم آمين

This is Egypt now...... the future is about to be changed, unbelivable? It is quiet difficult to stop it now. I'm proud to be related to this people, I'm proud to be Egyptian, Free Egypt
الشعب يريد...اسقاط النظام...وعدل نظام الحكم

-          ألف مبروك مقدماً انتصار الشعب يا ريت الجيش مايفتحش النار علي الشعب

-         من فضلكم نصلي النهارده ركعتين بالليل ربنا يسلم أولادنا بكره ويبرم لهذه الأمه أمر رشد, من لا يستطيع الاستيقاظ, يصليهم قبل ماينام

28 يناير: (جمعة الغضب)

-         يارب أملنا فيك كبير...ثم في شعب السعوديه المضياف

-         كداب يا صفوت يا قواد, كداب يا ماجد بيه حزبك موش بيحضن الشعب حزبك ب (...) الشعب, هوه ده الشعب اللي بتقول انه فوق راسك, يالا يا كلاب هانت.

-         يا أم خالد سعيد, يا أم السيد بلال يا ام ماريان ومريم يا كل أم فقدت الغالي في عهد السفاح, تقدروا تاخدوا العزا بعد فجر السبت القادم....احنا كمان دمنا غالي موش بس دم البو عزيزي

-         انتهي الدرس يا غبي

-         الحكومه وقعت في بعضها, الرئيس بيقول الحكومه مطالبه بالاستجابه لمطالب الشعب والفقي بيقول الرئيس لازم يتدخل وأعضاء في الحزب يلومون الحكومه أمال مين اللي حيطفي الولعه اللي حتاكل البلد دي يا ولاد اللذين.......أمي؟

-         الراجل بدأ يخرف....بيقول انه حيلقي كلمه غداً في افتتاح معرض الكتاب (....) حمرا

-         الرئيس ينتظر ماستسفر عنه الاوضاع.....يابن الألمعيه ياأذكي اخواتك الاوضاع تنتظر ما ستسفر عنه انت...افهم بقي

-         الشعب السويسي يحرر مدينة السويس من قبضة النظام المحتل, اليوم السويس وغداً الرئيس

-         الدماء تسيل في الشوارع يا سفاح الشعب.....لن يرحمك الشعب سقطت أم لم تسقط

-         مصدر أمني: الأمن يسيطر علي الأوضاع في جميع المناطق, عزيزي المصدر الأمني اي اوضاع؟ الفرنساوي ولا الدوجي ستايل؟

-         سيناريو تونس يتكرر: الفصل قبل الأخير: فرض حظر التجول, المصلون أدوا صلاة المغرب ولما فرغوا أمطرهم الأمن بالقنابل , الليله هي ليلة حبلي بالشدائد نسأل الله السلامه وأن يسدل الستار في سلام, دماء الناس ستهراق في جنح الظلام قرباناً للطاغيه اللذي قرر الصمود حتي الرحيل علي جثث الشعب, لك الله يا مصر, حظر التجول ثم يعقبه الفصل الأخير, نزول الجيش

-         الفصل الأخير جاء أسرع من كل التوقعات, الجيش بدأ في الانتشار والعادلي رسب فالشعب أتي بالامتحان من خارج المقرر والرئيس المخلوع ترددت أنباء عن احتمال خروجه للشعب ليدلي بتصريح هام ربما يكون قد فهمنا

-         كلاب العادلي بداوا يشعلون النار بجنون في المنشآت خاصة الحزب الوطني

-         الست كلينتون بتطالبنا بضبط النفس وتطالب الحكومه بضبط الامن.....انتي اللي حاتعلمينا يا حلوه ضبط النفس؟ ماعلمتيش جوزك ليه ياختي ضبط النفس مع الفستان الأزرق؟ من هنا ورايح ماحدش هايعلمنا احنا اللي حنكتب علي السبوره ليكم كلكم احنا ايه ومين

-         وزير خارجية بريطانيا اتكلم وزيرة خارجية أمريكا اتكلمت, عم مرعي بتاع الكلمه اتكلم....أبو الهول اتكلم انت فين يابن التييييت؟

شعر:

 الرئيس خارج الخدمه

الرئيس خارج الخدمه

يراقب بشغف الازمه

يطالب بضبط النفس

وقريباً يزيل اللبس

سيخرج علينا بكلمه

يريح بنطقها الأمه

كلمة عشقتوها كلكم

"خلاص أنا فهمتكم"

تحياتي

ألمعية الحاكم

الحاكم بطريقته الالمعيه

واتته فكرة جهنميه

لن يقتلنا بدمويه

سيكتفي بحبس الرعيه

انفرادياً في المدن المصريه

بحظر شامل وأحكاماً عسكريه

نم في أمان

سيدي الحاكم نم في أمان

واحتضن التاج والصولجان

لا تخشي الشعب الجبان

فهو بين المطرقة والسندان

وهذه الدماء زهرة أقحوان

تسيل الي قصرك تعبير امتنان

من شهداء أرسلهم زبانيتك للجنان

-         صمت الرئيس وصمت الحكومه أدي الي تحرك طبقة الغوغاء وانفلات الأوضاع وبداية السلب والنهب البلد بتتحرق يا تنح اظهر وبان ولك الأمان, يجب أن نفرق بين الشباب والناس المحترمه وكلاب الأمن ذوي الزي المدني الذين يشعلون الحرائق في كل مكان وبين الهمج الرعاع الذين بدأوا ينهبون كما كانوا يرون حكومتهم تنهب, اللهم مرر هذه الليله علي خير

-         سامي عنان رئيس الاركان المصري كان في أمريكا وقطع زيارته فجأه وسيصل للقاهره خلال ساعات, مدرعات الحرس الجمهوري تختفي ومدرعات الجيش تبدأ في الانتشار بكثافه كبيره, اللي انا فاهمه يا شباب ان الف مبروك البلد لا يديرها مبارك الآن, الجيش يتولي ادارة الأمور ورئيس مجلس الشعب سيذيع بياناً هتماً خلال ساعات....عمره مقبوله أيها الرئيس المخلوع

-         ابن اللذين ضحك علينا ده قاعد....يخرب بيت كده؟!

-         اللهم اجعل هذه الرؤيا حقاً...اللهم اجعل تفسير هذه الرؤيا خيراً, اضغط علي الرابط وشكراً لكل من شاركوني الحلم....نشرت يوم 6 يناير قبل أحداث تونس وقبل أحداث 28 يناير, اللهم صلي علي سيدنا محمد
http://www.facebook.com/diaa.diab1/posts/184015568294459

29 يناير:

-         ده بيتكلم عن برنامجه للفتره القادمه, وبينتقد الحرائق اللي عملها الشعب الهمجي, ده قاعد ده قاعد, الراجل صحته زي الفل, وبيتكلم عن الأوقات الصعبه اللي اجتزناها سوا, يخريب بيت كده, احنا حانلبس الخازوق المغري ولا ايه؟ طب والناس اللي ماتت, احنا اتقرطسنا, يعني ايه؟ قاعد علي قلبنا؟

-         ضحي بالحكومه علشان هوه وابنه يعيش, هارد لاك يا شعب مصر

-         طب يابن الرخمه قول انك حاتحل مجلس الشعب المزور.....اقالة الحكومه؟ بس كده؟ يعني الناس اللي ماتت دي كلها والدم ده كله بس علشان الحكومه؟ طب يا عم متشكرين ايها الشعب المصري يالا بينا عالسعوديه سيبوهاله يشبع بيها

-         يا جماعه تونس قعدت 27 يوم علشان بن علي يفهمهم, متوقعين يعني أذكي اخواته ده يفهم في أربع ايام بس؟ ليه يعني؟....هوه أينشتين...ادوله وقته احنا موش مستعجلين

-         خطاب الرئيس المخلوع....ويكأن الشعب كان ينادي في الشوارع "معسله يا بطاطا"

-         جدتي الله يرحمها كانت دايماً بتقول مثل لم أعرف معناه الا الآن "خربها وقعد علي تلها"

-         بالأمس رأينا الشعب يهتف للجيش ويحتضن مدرعاته بل رأيت شاباً بيوطي علي ايد مجند ويقبلها, ماذا سيحدث في الأيام القادمه بعد أن تترس الرئيس بالجيش كآخر كارت يملكه؟

-         أنا طول عمري كنت فاكره عبيط......أتاريه بيستعبط!

-         الداخليه التي طالما سحلت وقتلت وعذبت من أجل السفاح انطلقت تفترس الشعب وتنهبه الشعب والجيش يتكاتفان لحماية البلد يجب القصاص من كلاب الداخليه وكلاب أمن السفاح يجب محاكمة السفاحين هم ليسوا مصريين هم أعداء الوطن وسبب تخلفه وضياعه, فين ضباط الشرطه ولاد الناس؟ بلدهم محتاجاهم, انتوا فين يا ضباط الشرطه الشرفاء؟ انضموا للشعب والمدافعين عن البلد والا ستكونون شركاء لهؤلاء الكلاب

-         أري أمامي الآن جثث المصريين الأبطال أحسبهم من الشهداء, رؤوسهم مهشمه بقسوه قتلهم كلاب السفاح مبارك, حسبي الله ونعم الوكيل فيك يا قاتل الشعب, يجب أن يحاكم السفاح الأعدام لقاتل الشعب, يسقط السفاح الطاغيه, لن نتركك يا مبارك دمنا الغالي ستدفع ثمنه في محاكمه شعبيه عادله تقتص لفلذات أكبادنا سننادي جميعاً الموت للسفاح

-         في مداخله مع زميل يشكك في الثوار: بس الولاد دول موش كده يا (....), دي موش مجرد هوجه وخلاص, شفتي الفيديوهات يا  (...), المدرعه بتسحق الناس تحت عجلاتها والناس مابتجريش؟ الناس بتصلي والامن بيفتح عليهم خراطيم مياه بقوة 300 متر مكعب وهما بيتهزوا من قوتها لكن رجليهم متبته في الأرض, ماحدش يقدر يحكم عليهم الا اللي كان معاهم في ميدان التحرير, علشان خاطري برجاء ماحدش يحكم علي الناس دي او يسفه منهم لان دول دلوقت أنضف حاجه في مصر

30 يناير

-         الشرطه قهرت الشعب, عذبت الشعب, ضربت الشعب, قتلت الشعب وها هم كلابهم من المخبرين السريين اعلنوا الحرب علي الشعب فسلب ونهب, سينتصر عليكم الشعب وسيقدم كل كلب منكم للمحاكمه

-         المقدم هيثم التهامي من مديرية أمن القاهره يتحدث الآن للجزيره بيسالوه ليه ضربتم نار علي المصريين قال " حنعمل ايه المتظاهرين كانوا مكبوتين واحنا مانمناش بقالنا 5 ايام ومضغوطين من النظام" وسألوه شهود العيان شافوا سيارات الشرطه بينزل منها البلطجيه ينهبوا ويسرقوا قال " حنعمل ايه العربيات اتسرقت مننا والسلاح " بس خلاص موش هاعلق

-         حتي الذين عادوا للانتشار عادوا لأن هناك مخطط لاغتيال قادة التظاهر بالأسلحه التليسكوبيه الآتيه من اسرائيل والجميع في حالة تأهب لمواجهة التظاهره المليونيه يوم الثلااثاء

-         فرعون وحاشيته كانوا أرحم بشعب مصر من مبارك وكلابه, حينما جاءهم موسي قالوا لفرعون " أرجه وأخاه وأرسل في المدائن حاشرين" وفرعون كان أسرع فهماً من مبارك "فلما أدركه الغرق قال آمنت بالذي آمنت به بنو اسرائيل" بينما مبارك أقال الحكومه؟ يعني متآمر وأهبل

-         ربنا أكرم من انه يقتله, ظني بالله العلي القدير أنه سوف يمد في عمره وهو خارج السلطه بدون طاقم طبي عالي المستوي مع شوية أطباء امتياز وتأمين صحي وممرضات موش طايقينه وأدويه جينيريك زي قلتها حتي يتمني الموت فلا يمن الله عليه به, ثم بعد ذلك يقتله الله بقي شر قتله

-         يا شعب مصر, يا من حطمت خط بارليف بالأمس ستحطم القيد والأصنام اليوم, سيكون هناك آلام لكنها آلام المخاض, بعدها سيولد الأمل وستعود البسمه, النصر لمصر, النصر للشرفاء

-         يا شعب يا طيب يا حمال القسيه, فات وقت المطالبه برحيل الطاغيه الآن غير هتافك " الشعب يريد محاكمة النظام" الأعدام لقاتل الشعب الأعزل, الأعدام لمن سمح لكلابه المسعوره بترويع وسلب ونهب الشعب.

-         لا يندهش أحد مما فعلته وتفعله وستفعله الشرطه في الأيام القادمه, فقد أقسموا منذ اليوم الأول الذي ارتدوا فيه البدل الميري علي الخيانه العظمي, هم يؤدون عملهم فقط والذي لا يعرفون سواه "الخيانه العظمي" من قتل خالد سعيد والسيد بلال الي نهب البلد بأكملها واعلان الحرب عليها لتأديبهم علي غلطتهم في حق "البشوات" مع اعتذاري لمن أعرفهم جيداً من الضباط ولاد الناس

-         الآن بدأ يتولد الي ما يشبه اليقين أن انفجار كنيسة القديسين قد يكون تدبيراً أمنياً اما للفت الأنظار عن جرائم النظام أو لتصفية حسابات داخليه بين مراكز القوي التابعه للأب والتابعه لابنه , الذي ينهب ويسلب شعب كامل لن يتورع عن قتل 27 فرد وهم يحتفلون بعيدهم

31 يناير: (وصول سلاح القناصه)

-         عزيزي الرئيس المخلوع: المدد يأتيك من تل ابيب في ثلاث طائرات....والمدد يأتينا من العزيز الجبار بخمسة آلاف من الملائكة منزلين, النصر لمصر والعزة لله موعدنا أنت وكلابك في ساحة الشهاده

-         بعد اطلاعي علي قائمة أسماء الحكومه الجديده وجدت أن الرءيس المخلوع قام بتغيير الشواذ فقط لكن الحراميه واللصوص مازالوا كما هم؟!

-         ايشمعني يعني فاروق حسني هوه اللي انت غيرته؟ أديك كده ثبت التهمه علي الراجل الله يفضحك يا شيخ

-         بعد أن رأينا أسماء الحكومه الجديده وهي نفس أسماء الحكومه المقاله تقريباً باستثناء الهاربين والفاريين وكما ناشدنا الجيش بالتدخل , أناشد وعلي وجه السرعه الأطباء النفسيين بالتوجه فوراً للقصر الرئاسي للكشف علي القوي العقليه للرئيس المخلوع, احنا شكينا للحظات انه بيستعبط, بس ده طلع عبيط فعلاً؟

-         يا شعب مصر...انت الآن تواجه تل أبيب, أسلحه اسرائيليه بأيد مصريه...100% وتحدي "والمشرحه مابتكدبش"

-         الشمس والقمر والبحر والشجر والناس والدواب يطالبونك بالرحيل......فهمت ولا عروستي؟؟؟؟؟

-         سيدي الرئيس المخلوع: حين تلتفت العاهره بعد أن أعطاها الزبون أجرتها لتمسك بتلابيبه مطالبة اياه بفلوس التاكسي, بيبقي منظرها زباله, وبتسقط من عين الزبون, حتي وان أعطاها فلوس التاكسي لازم تنكشح من الأوضه بقي علشان الزبون يستريح شويه, فهمت ولا عروستي؟

-         يسقط: يعني يقع يعني يمشي يعني ورينا عرض كتافك يعني غور,
والنظام: اللي هوه انت, هااااه يابن الذكيه, فهمت ولاعروووووستي؟

1 قبراير:

شعر: أيها الثائر

أيها الثائر احمل الفأس واهو بها علي الصنم
ولا تترك كبيرهم فلطالما اهاننا كما الغنم
أعدوا النار والأخدود فلا تخش هذا الزخم
كبر وارفع الساعد سلمت يمينك فلتنتقم
ارفع الهامة لا تنحني لاح الفجر فلتغتنم

-         سيدي الرئيس المخلوع:الشعب الذليل المقهور يرضي بالفتات ويسعد بالمفاوضات, أما الشعب الثائر الحر فانه لا يقبل الا أن يملي شروطه فقط!

-         سيدي الرئيس : من أجل العشره نعرض عليك أن تختار لك أحد اللقبين 1- الرئيس المخلوع أو 2- الرئيس الفار ولكننا لن نسمح لك أبداً أن تحمل لقب "الرئيس اللي بيستعبط"

-         سيدي الرئيس المخلوع: الشعب بيقولك "طير انت"

-         سيدي الرئيس المخلوع: لقد حققت مالم يحققه الأنبياء.....جمعت الشعب المصري بكل طوائفه علي قلب رجل واحد

-         الرد علي علماء السلطه اللذين يحرمون الخروج اليوم: قال رسول الله : سيد الشهداء يوم القيامة حمزة بن عبد المطلب ورجل قام إلى إمام جائر فأمره ونهاه فقتله

2 فبراير: (موقعة الجمل)

-         الأمريكان اللي طول عمرك حليفهم الأول طرقعولك النهارده الفجر يا جميل وباعوك في سوق النخاسه, لم يبق لك الا شوية بلطجيه وحرقة قلب تل أبيب عليك

-         مليون بني آدم وأكتر قضوا يوماً في رباط, لم تحدث حادثه ولم تشوبه شائبه, اصطفوا للصلاه وظلوا يطالبون برحيل الطاغيه, واليوم يرسل النظام المجرم كما اعتاد في تزوير الانتخابات زبانيته للضرب والقتل والحرق, حتي يسهل علي بقية الأبواق والعملاء لصق تهمة البلطجه والتهور وانهم عاوزين يولعوا البلد ولكن يأبي الله الا أن يكشف الفضيحه الطاغيه يرسل مسجونين وشرطه سريه بل وضباط شرطه بالسنج والمطاوي والمولوتوف والخيول والجمال, وحتي الواحده والنصف استطاع المجاهدون صدهم واستطاعوا القبض علي المئات وتسليمهم للجيش بكارنيهاتهم الرسميه, التاريخ سيحاسب المجرم ولن نسكت ولن نتسامح مع المجرم اللذي دمر البلد, وعلي الزملاء اللذين نحبهم ونحترمهم ولا نشكك في وطنيتهم التفكير والتروي قبل اكالة الاتهام للذين قرروا الصمود والوقوف وقفة يتحدث عنها اعالم كله ...ساعة الحساب قربت, والفجر قادم باذن الله

-         فيه ناس علي مواقع كتيره وبصفه منظمه بتهاجم الشباب المعتصم في التحرير وبتسفه فيهم وبتشكك في نزاهتهم بل ووضع البعض صورة الرئيس مبارك علي بروفايله؟ كتعبير عن تأييده؟ أنا بقالي خمس أيام مابشفش النوم سهران عمال أرد هنا وهنا وللأسف أنا في رحلة عمل من بلد لبلد والنت صعب أوي والوقت ضيق, احتسبوا عند الله ودافعوا عن المساكين اللي بيتنهش لحمهم وسيرتهم بتتقطع في هجمه منظمه علي النت

-         ممكن يكون واحد وسخ بس بينقلك الحقيقه وعلشان الحقيقه مره كلنا بنسمع الجزيره لأن للأسف اعلامنا في الوقت اللي كانت المدرعات البوليسيه بتسحق الشباب الاعزل علي كوبري قصر النيل وهما جايبين لقطات أرشيفيه للنيل واتنين عشاق بيتودودوا زي العصافير علي الكورنيش, اذا كانت الجزيره أجندتها وسخه فاعلامنا للأسف خاين ومتآمر وأهبل كمان

3 فبراير:

-         الريس المخلوع وأعوانه عايشين في دور المأمور "ابراهيم الشامي" في فيلم الأرض لما قال لكلابه "اربطوا الراجل ده...من رجليه" بس النهارده يا ريس محمد أبو سويلم موش لوحده, محمد أبو سويلم مصر كلها معاه وبكره حيربطوك انت من رجليك

-         ما حدث في التحرير بالأمس هل هو من أنصار مبارك الاب ولا جمال الأبن اللي صعبان عليه ضياع العزبه من ايديه؟ واذا كانت هذه هي هدية مبارك الأب لشعبه في أول يوم بعد خطابه الاستعطافي لاعطائه فرصه لاثبات حسن نواياه فماذا سيحدث حتي سبتمبر؟ حيجيب ابنه؟

في مداخله مع أحد اللذين يرعبون المساندين للثوره بالفوضي والحكم العسكري:

نغمتك يا (....) نغمه شاذه عن ال80 مليون مصري؟ انت عايش في مصر ولا فين بالظبط؟ معلش افتح الفيديوهات وشوف الشباب شكلهم عامل ازاي وبيقول ايه, شوف الناس اللي بتهدي الشباب وبتطالبهم بالمسالمه, شفت منظر الامن اللي لابس مدني بييجي علي آخر الطابور ويصطاد واحد ويسحله ويضربه بالشلاليت؟ شفت الملازم اللي الشباب شالوه علي أكتافهم وهتفوله علشان انضم ليهم؟ سيادة الرئيس عاوز يطلع بكره يتكلم ومنظره زباله ادي الأوامر لرجالته بحرق البلد علشان يطلع يعلن استياؤه من المندسين, انا أعرف راجل مدير اقليمي عنده املاك ومرسيدس نزل ميدان التحرير بولاده ومراته, ماشفتش يامحمد الشاب اللي ماسك ايد خطيبته في عبد المنعم رياض وبيقول للكاميرا "دي بلدنا موش بلد مبارك" معقول دول حيحرقوا البلد اللي بيحبوها؟ عسكري ايه اللي حايحكمنا يا (....)؟ طب ماحنا بيحكمنا واحد من أفضل العسكريين اللي عرفتهم مصر؟ احنا دلوقتي نطالب باسقاط النظام وبعدين نفكر مين اللي يحكمنا ولن نقبل بحكم عسكري العسكري مهمته الجبهه وحماية الحدود كفايه بقي اللي يحكم لازم يكون عنده فهم للاداره وأخوال المجتمع المدني ولديه القدره علي التخطيط ورسم الاستراتيجيات وانتقاء التكتيكات ثم يخضع للمحاسبه الدوريه العسكري يا (....) لو وصل للحكم كل سنه وانت طيب حتكبر وتعجز وضهرك ينحني وحيفضل هوه موجود فوق المحاسبه وفوق المساءله وفوق القانون

في مداخله مع أحد عملاء الأمن من خريجي كليتنا:

علي فكره النار مشتعله في المقر الرئيسي للحزب الوطني القريب من المتحف المتحف بخير والناس اللي طلعت دي ناس محترمه أوي ولازم نتحري الدقه قبل مانتهمهم ونساهم في تشويه صورتهم حرام يبقي بينضربوا بالرصاص والغاز ومن الصبح من غير لقمه وبيتسيروا في الجناين والشوارع علشان بلدهم واحنا موش بس سايبينهم في المواجهه لوحدهم لأ ده احنا كمان بنسفه ونهاجم وبنتهمهم زور, عيب وانا وان كنت موش معاهم حاقف بكل قوه ضد أي زميل يحاول يركب موجة التهكم ورميهم بالباطل مهما كانت علاقنه بيه ان شا الله يكون أخويا.

-         نصيحه مخلصه من ابن بلدك: الحق كلم خادم الحرمين النهارده يحجزلك أوضه بيد أند بريك فاست والشعب يطالب برحيلك, لو استنيت لبكره الشعب سيطالب بشنقك, لو اتأخرت لبعد بكره الشعب لامؤاخذه هي (......)

-         يا جماعه انا بحاول أسيطر علي نفسي وأجنب كرهي الشخصي لمبارك , هناك ظهور مفاجيء لبعض رموز النظام ومفكريه علي قناة العربيه تنادي بالوفاء وتناشد باظهار طيبة الشعب ووفاؤه وتذكر بتنحي عبد الناصر وخروج الشعب للبكاء عليه رغم اننا كنا في نكسه, شوفوا هوه فكرة خروجه بطريقه شكلها حلو ممكن نتناقش فيها بشرط انه ينسحب دون مراوغه ودلوقت , انما وفاء وانه حلو وبنحبه وصعبان علينا صدقوني حتسيء اليه وحتبقي مبالغ فيها وغير مقبوله ومستفزه, الراجل قتل 300 مواطن في اربع ايام غير الجرحي وغير هروب الشرطه وهجومها علي الشعب, اشم فيما أراه محاوله لنظام مبارك وحرسه القديم لرمي كارت لانقاذ النظام كفرصه للم الشمل ثم الالتفاف والانقضاض علي قادة التحرك الشعبي ويحدث انتقال سلس للسلطه لحرس مبارك القديم كي تطمئن اسرائيل وامريكا ويظل كل شيء آمن بالنسبة لهم, هناك مؤامره خبيثه عفنه تحاك بليل والله خير الماكرين, احذروا قناة العربيه أشم فيها عفناً قوياً احذروا حرس مبارك يلم شمل نفسه, انهم قادمون

5 قبراير:

-         فيه ناس لا شافت أمن ولا شافت استقرار, شافت بلد بتضيع ومابقلناش قيمه وكلمة "يا مصري" بقت شتيمه وروسنا بقت في الأرض وبنمد عدونا الأول وعدو الأمه بالطاقه الازمه لقتل اخواننا وقتلنا نحن أيضاً, شفنا بلدنا اللي مليانه خير بتتقطع زي التورته وبتتوز...ع علي ابنه واحمد عز وشركاه شفنا ناس بتغرق في البحر وبتتحرق في القطر وبتتردم تحت التراب دون ان نري حساب وكأننا كلاب جربانه. شفنا مستقبل اسود لولادنا, شفنا ذلنا وانسلاخنا من جنسيتنا ولحسنا التراب علشان ناخد جنسيه كنديه, فقط لنهرب من بطش النظام, شفنا بطش وقهر وقتل وتعذيب واغتصاب وتعتيم اعلامي وتواطؤ , شفنا سحل واباده للفلسطينيين وأغلقنا المعابر حتي نسحقهم بين شقي الرحا, شفنا تلامه وغتاته وصلف وغرور وعناد واحراق للبلد بل وسلبها ونهبها من أجل ان يظل في موقعه ولا يقال عنه انه هرب وهزمته الجماهير

-         نائب رئيس قناة النيل الدولية قدمت استقالتها احتجاجا على التغطية الاعلامية من التليفيزيون المصرى ......بت عميله وخاينه عملت مقابله مع البيبي سي.....بعد ماخلصت المقابله الشرطه العسكريه قفشت معاها وجبة كنتاكي دينر بوكس سبايسي وواحد بيبسي دايت لارج

-         أمريكا شيكا بيكا...بتلعب علي كل لون يا باتيستا.....لازم نحافظ علي وحدتنا لأن الليل طويل أوي, أول امبارح عايزين الراجل يتنحي الآن...النهارده بيقولوا يستمر علشان الاصلاح؟

-         الأمريكان وقعوا في بعض وعاملين زي الفرخه الدايخه, كراولي دلوقت طالع بيقول ان ويسنر حمار وموش فاهم حاجه وبيعبر عن رايه الشخصي, يعني ايه؟ عاوزين السلطه الآن ولا ننزلها مع الحلو؟

6 فبراير:

-         في تعليق علي صورة عريس وعروسه بلبس الفرح متصورين جنب الدبابه: عريس وعروسه عملاء,اتعرفوا علي بعض في قطر واتخطبوا في تركيا وكتبوا الكتاب في اسرائيل وراحوا الميدان علشان يعملوا الدخله في كنتاكي....عملاء ولهم أجنده والعروسه اخوان...اخوان اخوان يعني.

-         شاب وشابه (تم تدريبهم في ايران برضه) بيتكتب كتابهم دلوقت حالاً في ميدان التحرير والشيخ بيدعوا لهم والناس كلها تدعوا لهم بالبركه, من أجمل المناظر اللي شفتها في حياتي, وأزمة الجواز اتحلت كمان أهه الحلم حيتحقق والصعب حيتصدق والغايب هيعود....قول يا منير وسمعنا...يا عميل يا ابن القطريه يا بتاع كنتاكي يا وحش

-         في تعليق علي فيديو الشباب اللي بيقول انه شغال مع مستر بوووش: وأخيراً اعتراف صريح وواضح وضوح الشمس يكشف العملاء الخونه ...من شباب 25 يناير المخربين والاخوان متورطون بشده فيما حدث, شاهد الفيديو للنهايه لتشاهد فتيات الاخوان المسلمين, أظن كده انكشفوا بقي؟

سيبوا العيال....والله ماهاتندموا

-         الناس اللي عايزه العيال اللي في الميدان يمشوا علشان الدم بقي للركب: الدم خلص خلاص والجيش والعيال عايشين حياتهم وقالبينها سوق عكاظ, واللي بيقول موقفين حالنا وموش لاقيين ناكل, لامؤاخذه مايشغلوا الأفران اللي في البلد واللي يلاقي الميدان مقفول, ياخد المحور, العيال دي لازم تفضل موجوده حتي يتنازل النظام كل يوم تنازل شكل الي أن تتحقق جميع مطالبنا هذا النظام لا ثقة فيه "أعملك ايه والطبع فيك غالب ..وديل الكلب ماينعدل ولو علقوا فيه قالب" سيبهم قاعدين من فضلك دول قاعدين علشاني وعلشان حضرتك كمراقبين علي ولاد الحرام اللي نهبوا البلد 30 سنه لغاية ماحقنا يرجع من أول دم الشهدا لغاية ال 40 أو ال 70 مليار دولار اللي قالت عليهم الجارديان بتاعت الكنتاكي العميله اللي مزقوقه من الشيخه موووووزه

7 فبراير:

-         اهداء خاص الي عملاء أمن الدوله اللذين ينتشرون علي النت ليقنعونا بأن الريس هو والدنا وماينفعش نعمل فيه كده, وان تاريخه واضربه الجويه وانه...... ربنا يحشركم مع من تحبون يوم الدين

-         لقد وجدت مخرجاً للأزمه حاجه كلنا ناسينها هوه موش الريس المخلوع كل شويه يعيي ويختفي في سفريه لألمانيا أو لفرنسا, طب بسيطه لما يتقندل ويعيي ويسافر , السيد عمر سليمان يعلن اقصاؤه لظروف صحيه ونخلص وننقذ البلد من الخراب اللي هوه معيشنا فيه بسبب دماغه الناشفه

-         عاجل: والله وعملوها الرجاله (عيال فوق الوصف)

-         شكلت المجموعات الشبابية التي كانت وراء حركة الاحتجاج الشعبي غير المسبوقة في مصر للمطالبة بإسقاط نظام الرئيس حسني مبارك قيادة موحدة باسم "القيادة الموحدة لشباب ثورة الغضب"، وأكدت أنها لن ترحل من ميدان التحرير في وسط القاهرة الذي أصبح معقلا لهذا التحرك، قبل استقالة الرئيس المصري.

-         ووعدت القيادة في مؤتمر صحافي بان "لا نعود إلى بيوتنا إلا بعد أن تتحقق مطالب ثورتكم الباسلة"، وذلك في بيان قرأه زياد العليمي احد الأعضاء الستة في هذه القيادة التي تشكلت في نهاية كانون الثاني/يناير، لكنها لم تعلن سوى الأحد.

-         وأكدت أنها لن تفض اعتصامها إلا بعد "استقالة رئيس الجمهورية" و"إلغاء حالة الطوارء" و"حل مجلسي الشعب والشورى"، و"تشكيل حكومة وحدة وطنية تتفق عليها القوى الوطنية". كما طالبت بـ"تشكيل لجنة قضائية تشارك فيها شخصيات من منظمات حقوق الإنسان للتحقيق مع المتسببين في حالة الانهيار الأمني الأسبوع الماضي وفي قتل وإصابة الآلاف من أبناء الشعب" و"الإفراج عن كل المعتقلين من زملائنا وفي مقدمتهم الزميل وائل غنيم"، الذي اعتقل في 26 كانون الثاني/يناير الماضي.

-         وتضم القيادة ممثلين لحركة 6 ابريل الشبابية وشباب جماعة الأخوان المسلمين والجبهة الديموقراطية ومجموعة العدالة والحرية وحملة طرق الأبواب وحملة دعم الدكتور محمد البرادعي

-         عمر سليمان في أول حديث له كنائب رثيس جمهورية لقناة إيه بي سي الأمريكية: الشعب المصري ليس جاهزاً للديمقراطية بعد
أمال هنكون جاهزين امتي يا روح تانت باكينام؟ لما تعتقلوا اللي في ميدان التحرير وتقولولنا أمكوا في العش ولا طارت؟

-         في تعليق علي فيديو الصحفيه اللتي تدربت في اسرائيل وجندها عناصر من حماس: للي بيشتموا في الجزيره, هيه الجزيره حيوانات آه بس بيلعبوها صح, شوف بقي الاعلام بتاعنا, بالنسبه للبنات اتفرجوا عادي الولاد يا ريت قبل ماتتفرج تنزل تشتري كيس رافع للخصيه علشان الفتاء (علي فكره الصحفيه دي زملاتها عرفوها وبلغوا عنها وسمير رجب وقفها عن العمل)

-         الجيل ده واضح ان لا بيفرق معاه سجن ولا قنابل, دي عيال مستبيعه يا عم الحاج موش زي الجيل بتاعنا, جسمه يتنفض من فتح علبة كانز

8 قبراير:

-         في تعليق علي حديث عمر سليمان مع البيبي سي: أنا شايف ان الحديث ده فضيحه, نطق فضيحه جرامر فضيحه, كلام فضيحه وعيب ونفس الاسطوانه ان الناس اللي خرجت في المظاهرات من الشباب خرجتهم الجماعات وان ماعندوش حاجه غير ان الناس تروح بيوتها علشان تجيب السياح؟؟؟؟ ومايقدرش يبقي رئيس لأن سنه كبير أمال عم الحاج النوغه اللي عنده 84 سنه ده يبقي ايه؟

-         حتي لا يتم تزوير التاريخ من قبل الزبانيه...اشهدوا كلكم علي شبابنا الأطهار ودافعوا عنهم, احفظوا انتم التاريخ لأن الكلاب بيزوروه من دلوقت ومعاهم ناس مننا موش عارف أسميهم ايه؟؟؟؟

-         الي كل المصريين في الخارج ولكل من لا يستطيع الذهاب لميدان التحرير, من فضلكم دافعوا عن المعتصمين في الميدان علي الفيس بوك بكل ما أوتيتم من قوه وقفوا صفاً واحداً ضد اختراقات الأمن وعملاء الحزب الوطني "المحظور" ولو موش قادر تعتصم ادخل وضع بوست أو ستيتس أو فيديو أو حتي اضرب لايك مع المساندين للثوار اللي بيتبهدلوا علشاننا

9 فبراير:

الموضوع أكبر مما تتخيلوا يا جماعه, فيه ناس بتتكلم كلام حنين وفي منتهي العقل بيدعو للتهدئه ولما أفتح بروفايلاتهم ألاقيها اما مفتوحه وبدون فريندس أو سيكيوريتي أو أجدهم أعضاء في جمعية المستقبل والحزب "المحظور" وساعات ألاقي الصفحه الرسميه لجمال مبارك أو حسني مبارك علي قائمة المفضلخه والجروب؟؟؟ بالله عليكم اتعبوا شويه يا جماعه علشان خاطر الناس اللي بتضحي علشاننا, لأن للسف السذج بيننا كتير ومالهومش ذنب

قراءه في خطاب عمر سليمان... "انسي يا عمر"

السيد عمر سليمان, الرجل اللذي كان لا يتحدث الا نادراً, ليته ما تحدث وليته ما تكلم, السيد عمر سليمان يقول لنا شيء ثم يقول للإذاعات الأجنبيه شيئاً آخر’ يقول للمفاوضين شيء ثم يقول للناس شيئاً آخر.

يقول لنا " سننفذ كل ماتطلبون" وفي لقائه مع ال إيه بي سي قال " ليس لدينا ما نقدمه أكثر من ذلك" "فاليذهبوا لبيوتهم وليأتوا بالسياح والنقود للاقتصاد" ؟؟؟

يقول "نحترم الشباب ونعلم أنها ثوره شعبيه" ثم يقول للإيه بي سي "انها ثوره حركتها الاتجاهات الاسلاميه"

سيدي النائب: لم نعد ذلك الشعب الساذج اللذيذ اللذي يعشق الخداع والضحك علي الدقون, لم نعد نصدقكم والجمال والبغال والحمير تشهد علي ذلك.

لم نعد ذلك الشعب الخانع اللين اللذي ينهج بعد أول 100 متر هروله, والمليونيات المتتاليه وميدان الشرفاء والشهداء يشهد علي ذلك.

لم يعد سيد وهناء وتامر وخيري والتمثيليات الممجوجه وسرايا والقط هم مصدر معلوماتنا, فالجزيره والبيبي سي والعربيه بل والشقاوه علي الفيس بوك هناك وهذا المقال يشهد علي ذلك.

لم نعد "داقين عصافير علي راسنا" وجروح الرصاص المطاطي وغرز الخياطه علي جباهنا بل والرصاص الحي يشهد علي ذلك.

لم نعد ذلك الشعب اليائس المتفرج ونزول رشا وزوجها وحاتم ومروه ونسرين وهؤلاء الشرفاء ذوو الأحلام البسيطه في جمعة الغضب يشهد علي ذلك.

كلنا الآن يعلم أنكم مراوغون وكذابون وأفاقون وتحاولون الدفاع عن هذا النظام المترهل المهتريء باستماته لأنه الوحيد اللذي يبقي طريق الفساد مفتوحاً لكل لص وفاجر يريد أن يستمر في نهب هذا البلد وقهر شرفائه.

سيدي النائب: عار عليك, عار عليكم جميعاً ويجب أن تعلموا أن ممارساتكم اللتي كنتم ترتكبونها في "عطفه" قد خرجت الآن الي "زفه" يراها العالم كله.

اعلم يا سيدي النائب وأعلم من وراءك أن الشعب سينتصر وسنسترد منكم مصر لتكون لنا ولأبنائنا وليست لأصحاب المصالح سواءاً الموجودين علي رأس النظام أو الموجودين علي حدودنا الشرقيه أو المترقبين علي المكتب البيضاوي في البيت الأبيض, حتي وان انتصرتم يا سيدي النائب قستحصلون علي أنقاض شعب وجثث متحلله سيميتكم ويقضي عليكم عفن تحللها وستنزلق أقدامكم من لزوجة دمائنا المهراقه علي الطرقات, فقد قرر الشعب اما أن يحيا بحرية وشرف أو يموت فداءاً لهذه الأرض.

سيدي النائب: لا نريد البرادعي ولا نريد المنتفعين اللذين يتكالبون علي اللقمه التي ألقيتم لنا بها, ولا نريد رموز الأحزاب جميعها, ولا نريدك أنت أيضاً أيها المراوغ الثعلب.

الله اللذي ألهب ثورة "ورد الجناين" ونجي بفضله سفينتها من رياحكم العاتيه وأمواجكم العاليه, هذا الإله قادر علي أن يبعث لنا قبطاناً كريماً وطنياً يحب هذا البلد ولا يعرف الكذب والمراوغه واتهام الشعب بعدم النضج وأنهم غير جاهزين للديموقراطيه.

من فضلكم أنظروا الي شعبكم, لقد كتبت له شهادة ميلاد جديده فجر 25 يناير وأصبح هذا الوليد عملاقاً قوياً يشاهده العالم كله بفخر واعجاب.....إلا أنتم؟؟؟؟؟

تريدون خداعنا؟ والله لن يكون, وليس بعد اليوم خداع. سيدي النائب: "إنسي يا عمر"

-         تعليقاً علي فيديو تامر بتاع غمره: سوما العاشق يتحدث عن الثوره: نصحت بالأمس الشباب انهم يشتروا كيس رافع للخصيه, النهارده بقوللهم اشتروا كوندوم ودوروا علي الواد ده....هاتنبسطوا أوي, اللي موش هايشوف الفيديو ده يبقي فاته الثوره كلها.

10 فبراير: (ليلة الخطاب الأخير)

-         الله يخرب بيت تناحة أهلك...العالم كله نطق, موشي يانج هون كونج,سوزانا أوف تيكساس....ايف دو فرانس ...ميس ماجواير....ارحل بقي أنا اتسلقت.

-         في تعليق علي خبر صحيفة بديعوت عن مساعدة خبراء اسائيل لمبارك في قطع النت: وحياة خالتك ماهينفعوك....ده ان ماكانوش اخترقوا ملفاتك كلها وحصلوا علي ملفات التسليح السريه بتاعتنا يا مغفل.

-         ولعلمكم...لم تكن هذه الثوره لتنجح بدون توجيهات السيد الرئيس, راعي الثورات في مصر

-         للي ضحي بدمه علشان يحرر مصر...اوعي اللي ماعندوش دم يضيعها من ايديك تاني

-         في تعليق علي حادثة استخدام رصاص حي من قبل ضباط في الوادي الجديد رغم كل ما حدث والفضيحه الاعلاميه: حادثة ضابط الوادي الجديد وبعد كل ماحدث ويحدث ذكرني بالنكته التاليه:اتنين شباب متعودين يمشوا مشي بطال, فقرروا التوبه عن مصاحبة فتيات الليل واتجوزوا بنتين المفترض انهم بنات أصول, تقابل الشابان يوم الصباحيه.
الأول: ها عملت ايه؟
الثاني: اسكت بعد ماخلصت نسيت واديتها خمسين جنيه, عيطت وسابتلي البيت
الأول: احمد ربنا أنا اللي اتجوزتها, بعد ماخلصت باديها ميت جنيه, رجعتلي خمسين
هاه فهمتوا قصدي؟

-         حتي في اللحظات الأخيره....الغتيت مستخسر فينا الفرحه

-         ادعوا ربنا يسترها لأني أسمع منذ فتره عن انقسام شديد وربنا يسلمها لأن الحرس الجمهوري تسليحه متطور جداً ويضم أفضل عناصر الجيش المصري بعد الصاعقه, يارب أدعوا اليك يا رحيم بدعاء سيدنا يعقوب "ادخلوا مصر إن شاء الله آمنين " يا رب سلم سلم فليكن دعاؤكم "يارب سلم سلم, الوضع حرج جداً فليخبر كل منكم والدته أن تدعوا "يا رب سلم سلم ""

-         أطالب بالكشف علي القوي العقليه للرئيس وفوراً , مين معايا؟؟؟؟؟

11 فبراير: (يوم التنحي)

-         تحذير : ماسورة أكونتات انفجرت ف الفيسبوك للحزب الوطني بعد خطاب مبارك ..

و ده يفسر غيابهم الكام يوم اللي فاتو .. حسسونا ان الناس كلها مع الثورة .. وبعد الخطاب انتشروا عشان يحبطونا و يحسسو الشباب ان الناس اتأثرت بالخطاب ...

الحذر الحذر يا جماعة......... .. الناس على مواقفها

-         أحبابي وأحباب مصر أرجوكم مانقطعش في بعض, لأن كمان ساعات قليله سننقسم كلنا الي شطرين وسيبدأ الناس في الغضب والتطاول علي بعض وهناك جهات عده تغذي هذا, هناك عشرات الآلاف من الأكونتات المضروبه للحزب الوطني والمخابرات تشتعل نشاطاً ونشر اشاعه مفادها ان اسرائيل تحشد قواتها علي الحدود وان البوارج الأمريكيه تقف في سفاجا للهجوم علي مصر واحتلالها بينما المتظاهرين يصممون علي الاعتصام, وهذه الدعوه تثير الرعب بين الناس الآن, سننقسم الي قسمسن متناحرين, ارجوكم حافظوا علي وحدة الرأي ولا تتناحروا.

-         احنا بيتلعب بينا الكوره الشراب....احنا مالناش اي قيمه ولا بلدنا لها أي قيمه عند النظام اللي أنا بقيت موش عارف هوه ايه أصلاً....هوه ايه النظام؟؟؟؟

بعد التنحي:

-         اليوم يوم محبه وفرحه وشكر وعرفان لله, اليوم يوم سجود وتضرع بالحمد والشكر, اللي جاي أصعب نحن حطمنا الأصنام وبقي البناء والبناء أصعب بكثير من الهدم, وطريقه طويل وشاق وسيأخذ منا جهداً وعرقاً وزمناً فالننسي الأحقاد ولنبني مصر, مصر التي ظلموها وأهانوها فلنعد لها عزتهاو تحيا مصر

-         اللهم ارحم شهداءنا اللذين رووا أرضنا بدمائهم, اللهم ابدلهم أهلاً خيراً من أهلهم ودوراً خيراً من دارهم, وشكراً للصامدين في ميدان التحرير, شكراً لكم وأعتذر لكم من كل من سفهوكم وخذلوكم وكفروكم وسبوكم ونهشوكم وحقروكم, شكراً لشعبنا الصامد اللذي أعاد كتابة التاريخ يارب اللهم أبرم للأمة أمر رشد وعزاً لا ذل بعده.

-         يا شعب مصر قالوا عليك سلبي, قالوا بتاع الفول, قالوا ده مات, قالوا همجي....جبت السبوره والورقه والقلم وبكل شياكه وقوه وبكل عزه وحماس كتب وصفه ورسمه وأعاد تعريف مصر والمصريين في معاجم العالم, لم يوقفه الرصاص ولا الغاز ولا الدهس تحت المدرعات ولا فتاوي علماء السلطه أناب الي الله فنصره الله, أنا مصري

-         الشباب بتوع التحرير بيهتفوا....عاوزيييين كنتاكييييي, بجد موش هزار, دول بقالهم اسبوعين عايشين علي العيش والبقسماط والجبنه النستو واحنا هنا هارينهم علي الفيس بوك تريقه وشتيمه ...حقكم يا شباب, الطيارات جايه من تل أبيب وايران بالسخن والبيبسي هاتبعتوا الشيخه موزه, سامحونا يارجاله ماكناش نعرف انكم أنضف ناس في مصر

12 فبراير:

-         اللهم لك الحمد, كان فضلك علينا عظيما, أزحت الغمه, وكشفت لنا المصيبه المسماه عمر سليمان التي لم نكن ندرك حجمها, كشفت لنا المنافقين والأفاقين والباراشوتات, كشفت يارب حتي لأبسط البسطاء وأكثرهم سذاجه كم كان هذا النظام دنيئاً وشيطانياً كشفت لنا أن العزم اذا صح فان نصرك آت.

-         أيها الاحباب , ألف مبروك, أسألكم أن تجمعوا أسركم وأولادكم هذا المساء حول براد من الشاي الساخن أو ابريق من الليمون المنعش واحكوا لهم عن مصر والثوره وبطولة الثوار وتضحياتهم واحكوا لهم عن الخيانه والمنافقين, احكوا لهم عن بلدنا الحبيب احفظوا التاريخ وعلموهم لأنه لن يمضي وقت طويل حتي سيحاول المرجفون تشويه الثوره الشريفه بل هم قد بدأوا من الآن, احفظوا تاريخها من التزوير, ثم قوموا فصلوا صلاة الغائب علي أرواح الشهداء.

13 فبراير:

أجمل تعليق تلقيته بعد التنحي من صديقي وحبيبي د/ ه ع:

سامحنى يا صاحبى....انت اللى كنت صح وانت اللى كنت على حق...وانت اللى كنت حكيم و عاقل.....كان معاك حق لا للحلول الوسط والاكتفاء بهذا القدر......ما اجمل ان ينتصر الخير انتصارا كاملا لا ينقص..و بدون اى تنازلات او حلول وسط....تقبل اعتذارى عن محاولاتى لتهدئتك والتى كنت تستجيب لها كالعادة بمنتهى الاحترام والتقدير لشخصى بدون اى اتهامات لى...تقبل اعتذار اخوك الاقل حكمة و رؤية ثاقبة....والحمدالله على هذه النهاية الجميلة.

14 فبراير:

أصدقائي وأحبابي وحبايب مصر خدوا بالكم فيه تسخين جامد ومحاولات لتشويه صورة الجيش المصري وأنا تتبعت المصادر وجدت ان بعضها خارجي ومصدره جريدة الجارديان, كونوا حذرين في تداول المعلومات التي تشكك في الجيش, أفضل ما يمكن عمله الآن هو اعطاء الثقه المشروطه بالمتابعه لمطالبنا, ودعونا نساعدهم لأن ما ظهر من الجيش حتي الآن يعطي انطباع ايجابي, صحصحوا يا شباب وخليكوا واعيين

15 فبراير:

هناك موجه غداره قادمه لا أستطيع تحديد حجمها: نشطاء الحزب الوطني وشباب المستقبل التابعه لجمال مبارك أسست تسع صفحات علي الفيس بوك لتحسين صورة مبارك, ثم تحولت منذ الأمس للدعوه لمظاهرة شكر وعرفان لمبارك يوم الجمعه القادم من مسجد مصطفي محمود هناك احتمال للتخطيط للاشتباك مع المؤيدين كيوم الجمل لوضع الجيش في موقف حرج, أو قد يكونون يخططون للمطالبه لعودة الرئيس لكن دي بعيده شويه

16 فبراير: (ظهور كريزة "أنا آسف يا ريس")

احنا ماعملناش حاجه غلط علشان نتأسف, احنا قلنا كلمة حق عند سلطان جائر, وسوف نكمل المشوار بطلب محاكمته هو وابنه جمال

17 فبراير:

عمرو الليثي عن جريدة المصري اليوم: في حوار مع حبيب العادلي "لم أخضع لاي تحقيق من أي نوع وانا لم أسافر..أنا في بيتي" لو الكلام ده صحيح اختر الاجابه الصحيحه:
1- الشعب بتاعنا مع.ص
2- الجيش مع.ص
3-احنا الاتنين مع.صين

20 فبراير:

يا اعلامنا المصري أبوس جزمتك, أحب علي "فطيرك" احترموا عقلنا شويه, استضافوا أربعه ظباط شرطه الاربعه بيقولوا: ضرب الرصاص اللي قتل الشباب كان بأيادي أجنبيه, بولنديين وأمريكان والسلاح جابوه من سرقة الأقسام وانهم ماضربوش رصاص مطاطي, وانهم انسحبوا لأن المتظاهرين هجموا عليهم وان المتظاهرين قتلوا المئات من ضباط الشرطه لكن لم يتم اعلان ذلك حفاظاً علي علاقتهم بالشعب...A7A

21 فبراير:

ان شاء الله الشعب الليبي سينتصر....وسيخرج بعض العناصر الليبيه من فلول اللجان الثوريه ليطالبوا بجمعة "أنا آسف يا سيادة العقيد" دول بقي تعبطوهم في ميدان عام

-         قائمة شائعات الأيام الماضيه قبل أن ألقيها في سلة المهملات: مبارك في غيبوبه/مبارك مات/الجيش ناوي يضرب مليونية الجمعه والدم هيبقي للركب/وائل غنيم ماسوني/الاسطول الأمريكي في سفاجا واسرائيل احتلت رفح/مبارك جاسوس زرعه الموساد/مبارك جاله اكتئاب ورافض الدواء/مبارك بياكل كافيار وسويس تشوكلات

-         خير الكلام ما قل ودل: الجيش عاوز ينضف بس محتاج دعم شعبي, لذلك المليونيات المتتابعه والالحاح علي المطالب أكبر خدمه نقدمها للجيش حتي يستطيع ملاحقة فلول الفساد, الاعتصامات الفؤيه غالباً من ترتيب الحزب "المحظور" ويجب أن نفرق بينها وبين الدعوه للمليونيات, مليونية الثلاثاء القادم ضروره قصوي للقضاء علي ديل الفساد اللذي مازال يلعب وانقاذ ثروة الوطن المنهوبه قبل ضياع الوقت

22 فبراير:

-         الجيش الليبي.....حسابكم عند ربنا كبير ....انقذوا الشعب وانقذوا البلد من ابن المجنونه ده, لو حلف الناتو دخل عندكم ستصبحون عراقاً آخر

-         يابن المجنونه نهايتك قربت... ان شاء الله هينجح الشعب الليبي ويفورك وهانفتح احنا وتونس الثورتين علي بعض ونعمل ليبيا ريسيبشن

-         تخيلوا بعد كل اللي بيحصل في ليبيا يطلع مجموعه من المصابين "باللواط" السياسي يقولوا "احنا آسفين يا سيادة العقيد"

-         الأخ العقيد من الواضح أنه يستعمل أنواع عالية النقاء والجوده من أفخر طرب الحشيش الأفغاني الأورجانيك رفيعة التكرير ويتعاطاها علي هيئة لبوس شرجي بعد وضعها لمدة ساعتين في التلاجه علشان يستعطاها قبل ما يطلع علي الهوا

-         عاجل: انتحار القذافي ب38 لبوسه

-         بعد سماعي لخطاب القذافي اقول بكل أمانه مبارك جنبه عباره عن أنبوبة بروكتوجليفينول....بلسم يعني

-         شكراً وألف مليون شكر لكل فرد في الجيش المصري, ربنا يحفظكم لينا ولمصر, لقد جعلكم الله سبباً في انقاذنا من جنون المتشبث بالسلطه وحقنتم دماءنا ورفعتم رأس مصر

23 فبراير:

سيادة اللواء محمود وجدي: لما يطلع تلات أربع ضباط صغيرين من عندك يقولوا ان القناصه اللي كانوا بيقتلوا الشباب كانوا أجانب يتحدثون بلكنه أجنبيه ممكن نتريق عليهم ونقول ألفاظ بذيئه معناها أننا حقاً نعترض (أحا) ولكن عندما تعلنها أنت علي الملأ يبقي ردنا الوحيد ان الجمعه الجايه هاتكون جمعتك انت يا كداب يا مع.س, احترمنا نحترمك هاتعمل زي اللي قبلك هانعمل معاك زي ما عملنا معاه

24 فبراير:

-         اعلانات اطمن الهابله بتاعت الشرطه موش هاتطمن حد وتصريحات المسؤلين في الشرطه الهابله عن القناصه هاتزيد الطين بله, علشان يتصلح اللي بينا لازم اللواء محمود وجدي يقدم المجرمين والسفاحين بتوع موقعة الجمل والقناصه القذره وضرب الرصاص الحي للعداله, ساعتها هانطمن وساعتها أنا أول واحد هايضربله تعظيم سلام.....يا ريت الشرطه تتعلم المصداقيه والوضوح من الجيش...يا ريت

-         اهداء للواء محمود وجدي....من فضلك لا تضللنا مره تانيه, المره دي هانعديهالك علشان انت لسه جديد...القناصه مصريين وعند سعادتك في الداخليه, تحب نقبضلك عليهم كمان سعادتك يا باشا؟؟؟؟؟؟؟

-         أنا موش زعلان أبداً من محمود وجدي أو أي متحدث من الشرطه بيهرتل علينا, أنا مفقوع من الناس اللي مصدقاه وبيدافعوا عن كلامه كمان, بجد سبحان من نجي الثوره دي من شعبنا اللي يجيب الضغط والسكر والمراره, احنا أطيب وأسذج وأكتر شعب ينقط خلقه ربنا...اللهم ارحم الشهداء اللي استريحوا من وش الشعب ده

-         http://www.youtube.com/watch?v=o0WRDix6EOQ&skipcontrinter=1
هوه ده اللي انت عايزه يا محمود يا وجدي انت ورجالتك....آديك ولعت في البلد بكذبك وغباءك, رجالتك لما حسوا انك بتع.س عليهم طاحوا في الناس, والناس مشحونه من كلامك...النتيجه اصابة سائق...وتعذيب الظابط ربما حتي الموت, هو الآن في حاله خطره

-         عاجل جداً الي أي انسان له سلطة اتخاذ القرار: استنفروا ضباط الشرطه الشرفاء وولاد الناس المحترمين في اجتماع عاجل وناشدوهم ترشيح لواء أو حتي عميد شريف ونزيه لتولي وزارة الداخليه لا نريد كذاباً أو ديوثاً...حرام عليكم البلد موش ناقصه

-         لما أكون ظابط شرطه قتلت شباب زي الورد وأطلقت المساجين وقلعت بدلتي وهربت في عز ما البلد كانت محتاجاني وبعدين ألاقي مديري بيع.س عليا وبيقول ان القاتل يتكلم لهجه أجنبيه وان العنف مع المتظاهرين كان مبرر لأنهم قلو أدبهم وكمان يصرفلي علاوه 100% لاموءاخذه ماقتلش سواق اعترض طريقي ليه؟ أقتله وأقتل أبوه كمان, ماهو شعب رخيص وجهاز سيادي ووزير مع.س

28 فبراير:

قطع الدومينو تتساقط, نداء لكل من لديه ملف أو بلاغ عن الفساد تقديمه للنائب العام, تعالوا ننضف مصر

1 مارس:

-         يا حبايب مصر..الجيش محتاج مساعدتنا, وعمل صفحه علشان يسمعنا ويدرس مطالبنا وهما بيهتموا وبيردوا ونحن نقدرهم وسنقف بجانبهم وكما قلت سابقاً نعطيهم الثقه المشروطه بالمتابعه المستمره وايدنا في ايديهم وأرواحنا فداهم كمان. لو لك استفسار اسألهم هيردوا عليك, لو اكتشفت حاجه مهمه أو خطيره ابعتلهم فوراً, خليك ايجابي ولهتم بأمور بلدك, لو بتحب مصر اتعب عشانها شويه

-         أتمني أن يتم الاخوان جميلهم ويكملوا مع شباب الثوره وشرفاء البلد ويساندوا المرشحين الشرفاء في معركة الانتخابات الشرسه القادمه مع فلول الحزب الوطني وياريت يساندوا شخصيات شريفه ومستقله حتي وان كانت لا تنتمي للأخوان ويضعوا مصلحة مصر قبل مصلحتهم حتي وان كان علي حساب حصولهم علي الأغلبيه, هذا ما ينتظره شعب مصر من المخلصين الوطنيين من الجماعه المحظوره...قصدي الأخوان المسلمين

2 مارس:

-         تعليق علي كارثة تصدير الغاز: العقوبه المناسبه للي عمل في شعبنا كده هي افراغ أنبوبة غاز كامله واعطاؤه الكميه كلها في صورة حقنه شرجيه, وبعدين يجيب عود كبريت ويشكه أمام فتحة الشرج مباشرة في ميدان التحرير, وماحدش يقوللي عيب ده بطل الضربه الجويه

-         نسيت أقول حاجه بالنسبه لمجلس القوات المسلحه اللي الناس عماله تقول سيبوهم بقي كفايه طلبات، الناس بتوع المجلس اللي زي الفل دولا قالوا للشباب في آخر اجتماع ان شفيق هايمشي كمان شهرين, يعني الناس فاهمه أهه وبعدين هما اللي بيطلبوا يجتمعوا بالشباب علشان يسمعوا رأيه فالجيش يحتاج... الي من له رؤيا سياسيه لأنهم أولو قوة وأولو بأس شديد والسياسه موش شغلتهم, محتاجين اللي ينورهم ويبصرهم علشان يوصلوا الشعب لبر ا موش فاهم أنا نغمة "اتركوهم" دي شغاله علي ودنه كده ليه, نتركهم ازاي واحنا شركاء في عملية الاصلاح والنقاهه, نتركهم ونروح فين يعني؟ ايدينا معاهم يا استاذ سليمان دي ايد لوحدها ماتسقفش, هوه احنا ماسكين فيهم وبنعيط ونقوللهم عاوزين نخش الحمام؟ دحنا سايبين حالنا ومحتالنا وشغالين حلق حوش علي العصابه ولاد الهرمه اللي هتكوا عرض البلد.

5 مارس: (اقتحام مقرات أمن الدوله من قبل الشعب)

-         الساده المصابون ب "المثليه" أو مايعرف خطأً ب "اللواط" السياسي, شلنا الطاغيه قلتم "اجنا آسفين ياريس" شيلنا اللي بيتستر علي الفساد ويتلف الملفات قلتم "آسفين يا شفيق" و " انتخبوا شفيق رئيساً للجمهوريه" طالبنا بحل أقذر جهاز في البلد قلتم "آسفين يا أمن الدوله" قصروا وهاتوا من الآخر وقولوا "انتخبوا أمن الدوله لرياسة الجمهوريه"

-         عاجل: العثور في أحد مقرات أمن الدوله علي صفحات ترجع لثورة 1919 ومكتوب فيها "احنا آسفين يا كرومر" احنا آسفين يا ديلي سيبس" اتاري الهطل ده وراثي

10 مارس: (حرق كنيسة أطفيح واشتباكات مفتعله)

-         لا تزر وازرة وزر أخري....صدمتنا وكرهنا لأمن الدوله وظباط الشرطه المتورطين في قتل الشعب الأعزل يجب الا تثير فينا الكراهية لضباط الشرطه اللذين سيلبون النداء وينزلون للشارع اليوم, ساعدوهم, أظهروا لهم الموده, أثنوا عليهم بكلمات الامتنان والشكر, شيء من التسامح والتضحيه يا شعب مصر الكريم ويا ضباط الشرطه...عودوا لأحضان الوطن فوالله ما أحلاها ايدي في ايدك نرجع لمصر الأمان وللوطن كرامته

-         الفتنه الطائفيه....لعبه قديمه, ماعادتش بتخيل علي حد....ولعلمك ياللي بتلعب بيها.....هانخرج منها أقوي ,أكبر وأكثر نضجاً من ذي قبل, وكل اللي هاينتهزوها علشان يولعوها حريقه هاينكشفوا قدام الشعب...زي فنانين القائمه السوداء بالظبط الشعب فتح خلاص...العبوا غيرها...لم يعد أمامكم الا التصفيه الجسديه......وساعتها يبقي انتم اللي حكمتم علي نفسكم بالاعدام

19 مارس: (الاستفتاء علي الدستور)

أبوس ايديكم..بعد العزق اللي عزقتوه في بعض ده بنعم ولا, اياك تقعدوا في بيوتكم يوم الاستفتاء....انزل وقول رأيك وحط صوتك في الصندوق ....الفيس بوك موش بتاع انتخابات...الفيس بوك بتاع "خناقات" انزل وماتكسفش كاميرون دياز

20 مارس:

-         أنا أرفض ان مشايخنا الكرام ورموزنا الدينيه تقولنا ان قول "نعم" واجب شرعي....واستأت كثيراً من الفنانين اللي بنحبهم والدعاه الكرام اللي طلعوا في فيديو ساويرس علشان يفرضوا الوصايه علينا ويقولولنا قولوا لأ وخدوا معاكم خمسه, مع احترامي للجميع ده استفتاء، يعني شوري، كان الأولي بالفريقين أن يشرحوا لماذا نعم ولماذا لا، ذلك أفضل وأكرم من استغلال اسمهم ومكانتهم في قلوبنا لتحويلنا لمجرد "بصمجيه"

-         خلصنا من الاستفتاء والحبر الفوسفوري راح من علي صوابعنا، نتوجه بهذه الصوابع فوراً علي قفا الثلاثي المرح صفوت وسرور وعزمي, لا نجونا ان نجوا. يا مجلس يا اعلي، يا نائب يا عام، يا عصام يا شرف، يا ناس ياللي قلتوا نعم ، يا ناس ياللي قلتوا لأ، يا كل بيت فيه شهيد أو جريح او جائع أو عاطل أو مظلوم، صدقوني موش هاتتهنوا علي لقمه أو نومه الا لما نشقلط الثلاثي المرح، يا ناس فوقوا. ولاد التيييت دول موش بيتقبض عليهم ويتحاكموا ليه؟

23 مارس:

الشتيمه في الاخوان والوطني والسلفيين وأقباط المهجر والبرادعي موش هاتوصلنا لحاجه، ولا الاشاعات والتراشق اللفظي وتصفية الحسابات...تعالوا نعصر مخنا ونحاول نلاقي حلول ..علشان مستقبل مصر...بلدنا

25 مارس:

يا مسهل يا رب ..بصراحه احنا في ساونا سياسيه....شويه نسمع ان الشرطه العسكريه بتعتقل الناس وتكهربهم...وشويه نسمع ان الثلاثس المرح نهايتهم قربت.....بسيطه خالينا جاهزين بالبرنس وخلاص

27 مارس: (مظاهرات العمال في بريطانيا)

ضياء دياب: علي الحكومه البريطانيه احترام رغبة الشعب البريطاني....وعدم استخدام القوه المفرطه في قمع المتظاهرين والتحللي بضبط النفس. ياللا ياولاد ال.......

To the British strikers:
Please be civilized and “Protest like an Egyptian”

28 مارس:

-         شكراً يا جيشنا العظيم...بس خاليك معانا علي طول ..ورنات بقي هاه؟

-         ملحوظه: الجيش والشعب فله...الشعب لازم يزن لكن بأدب...والجيش الحقيقه بيستجيب بس لازم الزن يكون علي هيئة مطالب علي لسان الكتاب والاعلاميين ونشطاء "الفيك بوص" وليس علي هيئة "اتهامات وتشكيك" طالما عرفنا ديتها يبقي يالا نزن الفتره اللي جايه علي الثلاثي المرح...ولن نهدأ حتي نسمع صوت السيفون. بوسه حلوه للجيش من أجل البيان رقم 29

-         أنا المواطن المصري ضياء دياب أطالب جيشنا نظيف اليد بسرعة اعتقال ومحاكمة الثلاثي الفاسد عزمي والسرور والشريف ورئيسهم الفاسد مبارك وعيلته الفاسده، وأساند جيش بلادي في هذا المطلب بكل قوه وكل ما أملك (اطبعها وضيف اسمك وحطها علي بروفايلك، لازم نساند الجيش ضدهم)

30 مارس:

الفساد ليس أفعي له رأس واحده كما نعتقد، ان الفساد اللذي نواجهه مثل "الكايميرا" الوحش الأسطوري متعدد الرؤوس ولا ندري حقاً أي رأس تحتوي علي السم. الجيش يحتاج الي ضغط ومسانده شعبيه كبيره لاتخاذ قرار التحفظ علي الثلاثي المرح خاصة صفوت الشريف اللذي يمتلك أسراراً وملفات صادمه يخشاها الجميع.

1 أبريل:

المجاهد اللذي يدافع عن قضيه، يثبته الله بالقول الثابت في الحياة الدنيا وفي الآخره....آخر كلماته كانت الله أكبر....لم يأبه للموت ولم يرهبه الرصاص....لم يجبن ولم يتوسل انه حفيد الأسد عمر المختار اللذي قال "ننتصر أو نموت...لكننا لا نستسلم أبداً"

3 أبريل: (ماتش الزمالك وموقعة الجلابيه)

-         مباريات كرة القدم أصبحت عبء وهم وغوغائيه ونتائج وممارسات مخجله...طب مانلغيها لفتره ثم نعيد هيكلتها...ولا هيه هاتكون أعز من أمن الدوله يعني؟ وماحدش يقوللي ان اللي نزلوا في الملعب دول كانوا فلول أو اخوان أو سلفيين....دول الهمج اللي موديينا في داهيه والمتخلفين اللي جايبينا لورا، قفل الدوري يا عم الحج وكله يشجع في بيته

-         أعجبني في الواد أبو جلابيه انه واثق من نفسه ..بمعني أدق رابط "الجحش" هدفه محدد ولديه وضوح في الرؤيا...وأثبت للعالم كله أنه لا يأس مع "دريم" ولا "حياة" مع الهلس....أحلي هردبيسه...وهرتله للصبح

6 أبريل:

المجلس الأعلي كان معودنا قبل أي مليونيه ب 48 ساعه يتحفنا بخبر مفرح من العيار التقيل، يعني...تجميد أصول...منع من السفر....فتح ملفات...بدء تحقيقات...أي حاجه من حاجات البروكتوجليفينول اللي بتريح المسائل دي....لغاية دلوقت لا حس ولا خبر؟ لعل المانع خير؟ ولا هوه مابقاش فارق معاه ولا ايه؟ موعدنا 8 أبريل في السيكو سيكو والله الموفق

الجمعه الجايه جمعة التطهير.....ولو الحال فضل زي ما هو هاتكون اللي بعدها جمعة "الطهور" . من فضلك هات الديتول معاك ...واتعقم

8 أبريل: (جمعة التطهير)

-         ميدان التحرير يعج بمئات الآلاف...عندما تتوحد الكلمه..صعب الحق يروح....وهذه الجموع هي اتحاد الشعب المستقل مع الاخوان مع السلفيين مع الليبراليين مع العلمانيين مع اليساريين الجدد مع الشيوعيين، لذلك أناشد الجميع..بلاش نشتم في بعض وبلاش ننشر المواد المشبوهه اللي بتشكك وتشوه في كل التيارات، اللي عنده حس وطني وبيحب بلده ياريت ينسي حظ نفسه وينسي أحقاده ويعطي الفرصه للم الشمل..تحيا مصر

-         التمزق والقبليه والخلاف وقت المعركه مع الفساد هو أول أسباب الهزيمه....أجتثاث رؤوس الفساد اولاً وبعدين ركام التلاتين سنه يحتاج الي وقت وجهد وعرق...والاصلاح يحتاج لسنوات...ترتيب الأولويات والصبر والعزيمه هي عوامل النجاح الأساسيه

10 أبريل: (خطاب مبارك عن ثروته "دي منبا يا معلمي منبا")

مبارك بيطلع لسانه للشعب في لغه لا تخلوا من الغطرسه والتهديد وجمال ابنه تغيب عن التحقيق، حاجه من اتنين اما مبارك يريد ضرب الشعب في الجيش وافقاد الثقه في الجيش أو الجيش متواطيء معاه فعلاً وبكده يبقي البلد هاتولع....الحل الوحيد ان الجيش يجيبه من قفاه قبل الجمعه الجايه هوه والننوس ابنه والا...البلد ستتحول الي طاسة زيت مغلي...اللهم هل بلغت...اللهم فاشهد

12 أبريل: (الأمر بالتحقيق مع مبارك ونجليه ثم صدور قرار الحبس)

-         لقد استحق مبارك أوسكار أحسن غباء عن جداره واستحقاق، وقد اختلف الكل عن تحديد من هو مفجر الثوره الحقيقي، وأقول بكل ثقه ان مفجر الثوره الحقيقي هو غباء مبارك، لأنه قدم للثوره ما لم نقدم لها نحن، لأننا ...... اتفشخناااااا ......اتفشخنا.....من أجل هذه اللحظه التاريخيه.

نكتفي بهذا القدر ونلتقي بعد الحكم، رفعت القعده.